ЗША будуць працягваць узнімаць беларускае пытанне ў Радзе Бяспекі ААН :: Хартыя'97 :: Навiны

Амбасада Злучаных Штатаў у Менску выступіла з заявай у сувязі з узняццем у Радзе Бяспекі ААН пытання аб парушэнні ў Беларусі правоў чалавека. “12 снежня ў Радзе Бяспекі ААН сталы прадстаўнік ЗША закрануў пытанні правоў чалавека ў Беларусі і галадоўкі Аляксандра Казуліна. ЗША выкарыстаюць усе магчымасці, каб абмеркаваць пытанне аб правах чалавека ў Беларусі. Прыкладам гэтаму стала рэзалюцыя Трэцяга камітэта ААН. Мы вітаем самаахвярнасць Аляксандра Казуліна і спадзяемся, што пасля выхаду з галадоўкі ён зможа працягнуць сваю дзейнасць, накіраваную на аднаўленне дэмакратыі і свабоды ў Беларусі. ЗША зноў заклікаюць беларускі рэжым вызваліць усіх палітвязняў”, – заявіў на брыфінгу ў Менску намеснік амбасадара ЗША у Менску Джонатан Мур.

Дыпламат не выключае, што беларускае пытанне будзе абмяркоўвацца ў Радзе Бяспекі ААН у будучыні.

“Гэтым разам беларускае пытанне было ўзнятае на паседжанні Рады Бяспекі ААН у якасці пункта парадку дня ў рубрыцы “іншае”. Мы не выключаем, што яно будзе ўзнімацца ў будучыні, магчыма, у якім-небудзь іншым фармаце”, – заявіў намеснік амбасадара ЗША у Менску.

Амерыканскі дыпламат не стаў каментаваць рэакцыю расейскага прадстаўніка пры ААН Віталя Чуркіна, які адмовіўся абмяркоўваць беларускае пытанне і пакінуў залу паседжанняў.

Нагадаем, што 12 снежня, падчас закрытых кансультацый у Радзе Бяспекі ААН па сітуацыі ў афрыканскай дзяржаве Кот-д’Івуар і ў Ліване амерыканскі амбасадар у ААН Уільям Брэнік нечакана ўзняў пытанне аб сітуацыі ў Беларусі. Амерыканскі дыпламат прыцягнуў увагу да галадоўкі пратэсту, якую трымаў у турме экс-кандыдат у прэзідэнты Беларусі, палітвязень Аляксандр Казулін і заклікаў ААН звярнуць увагу на парушэнне правоў чалавека ў Беларусі.

У адказ прадстаўнік Расеі пры ААН Віталь Чуркін адмовіўся абмяркоўваць незапланаванае пытанне і пакінуў залу паседжанняў.

Нагадаем, што Аляксандр Казулін 53 дні трымаў галадоўку ў выпраўленчай калоніі “Віцьба-3”, патрабуючы разгледзець у Радзе Бяспекі ААН праблему парушэння правоў чалавека ў Беларусі. За час зняволення і галадоўкі Казулін схуднеў на 41 кілаграм, стан ягонага здароўя значна пагоршыўся.