Аляксандр Мілінкевіч сустракаецца сёння з лідэрамі дзяржаваў :: Хартыя'97 :: Навiны

Лідэр аб’яднаных дэмакратычных сіл Беларусі Аляксандр Мілінкевіч бярэ ўдзел у з’ездзе буйнейшай партыі Еўропы – Еўрапейскай Народнай Партыі (ЕРР), які сёння адбываецца ў мясцовасці Мейзэ, непадалёк Брусэлю. З’езд ЕРР з’яўляецца сустрэчай на вышэйшым узроўні кіраўнікоў дзяржаваў і ўрадаў 10 з 25 краін Еўрасаюзу і лідэраў апазіцыі тых краін, дзе кіруюць правацэнтрысцкія партыі.

У праграме візіту Аляксандра Мілінкевіча запланаваны шэраг як пратакольных, так і неафіцыйных сустрэч з лідэрамі еўрапейскіх краін і кіраўніцтвам ЕРР.

З’езд адбываецца напярэдадні саміту Еўрасаюза, які 14 снежня адчыніцца ў Брусэлі. Галоўнай тэмай саміту стане абмеркаванне перспектываў пашырэння Еўрасаюза. Ад таго, якую пазіцыю ў гэты ды іншых пытаннях зойме ЕРР, найбольш уплывовая еўрапейская партыя, будзе залежыць далейшая ўнутраная і замежная палітыка Еўрасаюза.

У З’ездзе ЕРР бяруць удзел канцлер Нямеччыны Ангела Мэркель, прэм’ер-міністр Нідэрландаў Ян-Пэтэр Балканэндэ, прэм’ер-міністр Грэцыі Костас Караманліс, федэральны канцлер Аўстрыі Вольфганг Шусэль, прэм’ер-міністр Люксембурга Жан-Клод Юнкер, прэм’ер-міністр Швеціі Фрэдрык Рэйнфельд, прем’ер-міністр Мальты Лаўрэнс Гонзі, прэм’ер-міністр Славеніі Янэз Дрноўшэ, прэм’ер-міністр Латвіі Айгарс Калвіціс, і старшыня Еўрапейскай камісіі Жозэ-Мануэль Бароза. Свой удзел таксама пацвердзілі лідэры правацэнтрысцкіх партый Францыі - Нікаля Сарказі, Бельгіі - Жо Уандэурзэн, Нямеччыны - Эдмунд Штойбэр, Партугаліі - Луі Маркес Мэндэс ды Эстоніі - Тааві Вескімагі, прэзідэнт Румыніі Траян Басеску, прэм’ер-міністр Харватыі Іва Санадэр, прэм’ер-міністр Албаніі Салі Бэріша.