Беніта Ферэра-Вальднер: «Аляксандр Мілінкевіч – мужны змагар за дэмакратычныя свабоды Беларусі» :: Хартыя'97 :: Навiны

12 снежня лідэр дэмакратычных сілаў Беларусі Аляксандр Мілінкевіч быў узнагароджаны прэміяй Еўрапейскага Парламента імя Андрэя Сахарава “За свабоду думкі”. Прапаноўваем тэкст заявы камісара ЕЗ па знешніх сувязях і палітыцы дабрасуседства Беніты Ферэра-Вальднер з нагоды ўручэння Аляксандру Мілінкевічу прэміі.

“Я віншую Аляксандра Мілінкевіча з атрыманнем Прэміі імя Сахарава “За свабоду думкі” 2006 года.

Ён з`яўляецца мужным змагаром за дэмакратычныя свабоды і правы чалавека ў Беларусі. Як лідэр аб`яднаных дэмакратычных апазіцыйных сілаў Беларусі, ён паслядоўна выступаў за вялікую свабоду думкі і слова.

Уручэнне гэтай прэстыжнай прэміі з’яўляецца прызнаннем асабістых намаганняў Аляксандра Мілінкевіча, а таксама намаганняў усіх тых у Беларусі, хто змагаўся за дэмакратыю на сваю ўласную рызыку.

Гэтая прэмія нагадвае ўсяму свету аб адсутнасці свабоды і дэмакратыі ў Беларусі, і паказвае прыхільнасць ЕЗ будучыні, у якой Беларусь будзе свабоднай і дэмакратычнай.

ЕЗ перадаў гэтае пасланне народу Беларусі пасродкам новай прапановы аб партнёрстве ў рамках Еўрапейскай палітыкі добрасуседства. Народ Беларусі заслугоўвае жыццё без прыгнёту і пераследу. Беларусь заслугоўвае заняць сваё належнае месца ў свеце – і ЕЗ гатовы дапамагчы.”