Лукашэнка сыйшоў у падполле? :: Хартыя'97 :: Навiны

На гэтым тыдні Аляксандр Лукашэнка ні разу не з’явіўся на публіцы. І гэта нягледзячы на тое, што Расея падвысіла пошліны на нафту, якая пастаўляецца ў Беларусь. Ці не дзіўна, што ён не каментуе з уласцівай яму эмацыянальнасцю дзеянні “саюзніка”?

Аб тым, што з Лукашэнкам нешта здарылася, навяло на думку афіцыйнае інфармацыйнае агенцтва БелТА. Раніцай на сайце агенцтва была размешчаная інфармацыя, што Аляксандр Лукашэнка сёння сустракаецца з кіраўніком Сакратарыята прэзідэнта Украіны, старшынёй партыі “Наша Украіна” Віктарам Балагай. Аднак праз гадзіну заметка з сайта БелТА бясследна знікла. Замест яе з’явілася інфармацыя, што з украінскім госцем будзе сустракацца кіраўнік адміністрацыі прэзідэнта Генадзь Нявыглас.

Прэс-служба Аляксандра Лукашэнкі адмовілася каментаваць дадзеныя казусы прэс-цэнтру Хартыі’97.

Тым не менш, узгадаем, калі Аляксандр Лукашэнка з`яўляўся на публіцы ў апошні раз? Ні 12 снежня, калі ўрад Расеі абвясціў аб сваім рашэнні падвысіць пошліны на нафту, ні пазней яго не было відаць на тэлебачанні. Магчыма, ён рыхтуецца да сустрэчы з Пуціным падчас паседжання Вышэйшага дзяржаўнага савета так званай “саюзнай дзяржавы”, якое адбудзецца 15 снежня ў Маскве?

У прынцыпе, паводзіны Лукашэнкі не здзіўляюць. У самыя крызісныя моманты ён заўсёды сыходзіць ў падполле. Так было і пасля прэзідэнцкіх выбараў у сакавіку, калі масавыя пратэсты ў Менску прымусілі яго бясследна знікнуць амаль на два тыдні і перанесці ўласную “інаўгурацыю”.