140 студэнтаў БДПУ выказаліся ў падтрымку звольненага выкладчыка :: Хартыя'97 :: Навiны

Больш за 140 подпісаў студэнтаў другога курсу гістарычнага факультэту ў падтрымку Юрыя Бачышчы, выкладчыка катэдры Славянскай гісторыі БДПУ, былі перададзеныя ў суд і прыкладзеныя да справы аб аднаўленьні выкладчыка на працы. Студэнты паставілі свае подпісы пад заяваю ня гледзячы на ціск з боку адміністрацыі унівэрсытэта - у дэканаце паведамілі, што выключаць пяць чалавек са сьпісу падпісантаў.

Нагадаем, што ў Маскоўскім судзе Менску йдзе працэс аб аднаўленьні выкладчыка Юрася Бачышчы на працы. Ён быў звольнены пасля прэзыдэнцкай кампаніі ў якой Юры Бачышча ўдзельнічаў у якасьці незалежнага назіральніка. Кіраўніцтва катэдры і факультэта прапанавала яму звольніцца па ўласнаму жаданьню, аднак выкладчык адмовіўся. Праз некалькі дзён яму паведамілі, што ён звольнены за “амаральны ўчынак”. У чым сутнасць гэтага “учынку”, выкладчыку не паведамілі.

Юры Бачышча перакананы, што яго звольнілі за палітычныя перакананьні й грамадзкую актыўнасьць, таму ён падаў зыск у суд аб аднаўленьні на працу. У адказ унівэрсытэт абвінаваціў яго ў тым, што ён распаўсюджвае сярод студэнтаў матэрыялы, якія абражаюць гонар і годнасьць прэзыдэнта.

Гэтыя матэрыялы фігуруюць у справе. Дыск з мультфільмамі з персанажам падобным на Аляксандра Лукашэнка быў перададзены з катэдры універсітэта ў суд. Аднак Пракуратура не выявіла доказаў таго, што выкладчык Юры Бачышча мае да гэтага дыску нейкае дачыненьне.