ЛУКОЙЛ гатовы паставіць у Беларусь 4 мільёны тон нафты, калі задаволіць цана :: Хартыя'97 :: Навiны

НК “ЛУКОЙЛ” у самы блізкі час плануе падпісаць рамачнае пагадненне аб пастаўках у Беларусь у 2007 годзе 4 млн тон нафты, паведаміў прэзідэнт кампаніі Вагіт Алекпераў журналістам у Маскве ў пятніцу, паведамляе “Інтэрфакс”. “Магчыма, гэты пратакол будзе падпісаны нават сёння”, – дадаў ён.

Як паведаміў Агенцтву нафтавай інфармацыі (АНІ) першы віцэ-прэзідэнт ЛУКОЙЛа Равіль Маганаў, “ЛУКОЙЛ” падаў заяўку на ўключэнне кампаніі ў экспартны графік на першы квартал 2007 года пастаўкі нафты ў Беларусь у ранейшых аб`ёмах.

Па выніках 2006 года пастаўкі “Лукойла” у рэспубліку складуць прыкладна 2 млн тон нафты.

Разам з гэтым кіраўнік “ЛУКОЙЛа” дадаў, што пастаўка нафты ў Беларусь у аб’ёме 4 млн тон нафты ў 2007 годзе будзе здзейсненая пры наяўнасці тэхнічных магчымасцяў “Транснафты” і месца ў графіку, а таксама “калі цана задаволіць абаі бакі”.

“Зараз мы аналізуем эканоміку паставак у Беларусь, але яе складана прагназаваць”, – сказаў ён.

Па словах В.Алекперава, дэкларатыўна “ЛУКОЙЛ заўсёды быў гатовы пастаўляць у гэтую рэспубліку 4 млн тон нафты ў год, але графік і тэхнічныя магчымасці не дазвалялі”. “Гэты рэсурс у нас ёсць”, – сказаў ён.

У 2005 годзе “ЛУКОЙЛ” паставіў у Беларусь трубаправодным транспартам 2,04 млн тон нафты.

Як паведамлялася раней, Расея вырашыла ўвесці з 1 студзеня 2007 года пошліну на пастаўкі нафты ў Беларусь у памеры $180,7 за тону.

У цяперашні час расейская нафта пастаўляецца ў Беларусь бяспошлінна ў рамках пагаднення аб стварэнні Мытнага саюза.

Сваё рашэнне расейскі бок тлумачыць тым, што Беларусь скасавала міжурадавае пагадненне, па якім 85% пошліны на экспарт, у прыватнасці, нафтапрадуктаў, вырабленых у Беларусі з расейскай сыравіны, павінны быць залічаныя ў расейскі бюджэт, і толькі 15% – у бюджэт Беларусі.

Па ацэнцы экспертаў, Расея штогод недаатрымлівае больш за $4 млрд з-за розніцы ў экспартных пошлінах у Беларусі і Расеі на нафтапрадукты, якія вырабляюцца з расейскай нафты.

У 2006 годзе пастаўкі расейскай нафты ў Беларусь складуць не менш за 20 млн тон. У структуры пастаўшчыкоў на долю “Сургутнефтегаза” (РТС: SNGS) прыходзіцца амаль 30% паставак нафты ў Беларусь, “Роснефти” (РТС: ROSN) – 25%, “Сибнефти” (РТС: SIBN) – 13%, “ЛУКОЙЛа” – 11%, “Славнефти” – 10%, “Русснефти” – 6,5%, іншых пастаўшчыкоў – 4,5%.

Як паведамляў Агенцтву нафтавай інфармацыі (АНІ) віцэ-прэзідэнт АК “Транснефть” (РТС: TRNF) Сяргей Грыгор`еў, транспартная манаполія не чакае з боку расейскіх нафтавых кампаній памяншэння заявак на прапампоўку нафты ў накірунку Беларусі.