Казулін можа зноў пачаць галадоўку :: Хартыя'97 :: Навiны

Экс-кандыдат у прэзідэнты Беларусі, палітвязень Аляксандр Казулін у любы момант можа зноў пачаць галадоўку. Аб гэтым паведаміў адвакат палітыка Ігар Рынкевіч, які сёння сустрэўся ў калоніі “Віцьба-3” са сваім падабаронным.

Паводле адваката, Казулін паведаміў яму, што толькі прыпыніў галадоўку. “Зараз яго вага складае 63 кілаграмы, ён выходзіць з галадоўкі, п`е разведзеныя сокі. Падзенне вагі спынілася. Тым не менш ён зноў можа аднавіць галадоўку, калі ў беларускім пытанні не будзе кансалідаванай пазіцыі Еўразвяза або пайдуць нейкія зваротныя рухі ў пазіцыі міжнароднай супольнасці”, – сказаў І.Рынкевіч.

“Афіцыйна Казулін спыніў галадоўку 11 снежня, калі ён падаў адпаведную заяву на імя начальніка калоніі. У гэтай заяве палітык выказаў удзячнасць усім людзям добрай волі, падзякаваў іх за салідарнасць і падтрымку. Казулін таксама выказаў глыбокую ўдзячнасць Еўрапейскаму Звязу, Еўракамісіі і асобным еўрапейскім дзяржавам, а таксама Джорджу Бушу і Злучаным Штатам Амерыкі”, – паведаміў І.Рынкевіч.

“Асабліва натхніла тое, што ўсе фармальныя працэдуры, якіх у свеце дыпламатыі дбайна прытрымваюцца, былі амбасадарам ЗША у Радзе Бяспекі ААН адкладзеныя ў бок дзеля выратавання аднаго чалавечага жыцця”, – працытаваў заяву А.Казуліна І.Рынкевіч.

Тым не менш, паводле адваката, экс-кандыдат у прэзідэнты не пракаментаваў дзеянні амбасадара Расеі ў Радзе Бяспекі ААН Віталя Чуркіна, “таму што яны занадта відавочныя”.

І.Рынкевіч адзначыў, што яго падабаронны “настойвае на фармаванні ўрада народнага даверу і неадкладным прыняцці ім усёй поўнасці легітымнай улады”.

Нагадаем, А.Казулін праводзіў галадоўку з 20 кастрычніка па 11 снежня. Палітык галадаў з мэтай прыцягнуць увагу Рады Бяспекі ААН да сітуацыі ў Беларусі.