У дзевяці гарадах Польшчы прайшлі акцыі салідарнасці з Беларуссю (Фота) :: Хартыя'97 :: Навiны

Акцыі салідарнасці зь Беларуссю прайшлі 16 снежня ў Кракаве, Любліне, Сопаце, Познані, Уроцлаве, Лодзі, Беластоку, Пултуску і Варшаве.

У Познані каля помніка паэту Адаму Міцкевічу адбыўся мітынг, у якім прымалі ўдзел 50 актывістаў арганізацыяў “Maladya Demakraty” і “Nezalezhny prafsajuz studencki”. Людзі выказалі салідарнасць з беларускімі палітвязнямі і запалілі свечы салідарнасці.

У цэнтру Беластоку з’явілася шмат плакатаў, якія інфармавалі аб тым, што шэраг вышэйшых беларускіх службоўцаў – сакратар Савета бяспекі Віктар Шэйман, міністр унутраных спраў Уладзімір Навумаў, камандзір спецназа ўнутраных войскаў Дзмітрый Паўлічэнка і былы міністр унутраных спраў Юрый Сівакоў – падазраюцца міжнароднай супольнасцю ў выкраданнях і забойствах лідэраў апазіцыі і журналіста.

У Лодзі людзі выйшлі ў цэнтр горада з партрэтамі палітвязняў і зніклых палітыкаў, бел-чырвона-белымі сцягамі і расцяжкай “Салідарнасць з Беларуссю”.

У Кракаве прайшло шэсце салідарнасці з беларускім народам. Беларусы і палякі шпацэравалі па гораду з беларускімі нацыянальнымі сцягамі і транспарантам “Свабоду палітвязням Беларусі!”. Шэсце скончылася ля помніку Грунвальдскай бітве, дзе былі запаленыя свечкі салідарнасці.

За некалькі дзён да гэтага мерапрыемства ў Кракаве былі расклееныя плакаты з інфармацыяй пра Дзень беларускай салідарнасці, а ў буйнейшай мясцовай газеце выйшла інтэрвію з беларускімі студэнтамі, дзе падрабязна распавядаецца пра сітуацыю ў Беларусі.

У Сопаце прайшоў адкрыты прагляд фільма пра акцыі пратэсту у Беларусі ў сакавіку 2006 года, пасля прэзідэнцкіх выбараў – “Урок беларускай мовы” Мірэка Дэмбіньскага

У Варшаве беларусы паставілі намёт на Замкавай плошчы – каля вялізных партрэтаў ахвяраў ваеннага рэжыму ў Польшчы, якія выстаўленыя ў цэнтры сталіцы да 25-ці годзьдзя ўвядзеньня ваеннага становішча. Прайшлі выстава фотаздымкаў зь Беларусі, паказ кароткіх фільмаў і кліпаў пра беларускія падзеі ў сакавіку 2006 года, калі дзесяткі тысяч беларусаў удзельнічалі ў акцыях пратэсту.

Інфармацыя з іншых гарадоў працягвае паступаць.

Кракаў

Сопат

Уроцлав

Лодзь

Пултуск

Варшава

Беласток