Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
У Баранавічах затрымалі былога кіраўніка штаба Мілінкевіча 19:30, 18/12/2006
Міліцыянты і супрацоўнікі КДБ прыехалі сёньня да старшыні баранавіцкай філіі “Таварыства беларускай мовы”, кіраўніка баранавіцкага перадвыбарчага штабу лідэра дэмакратычных сілаў Аляксандра Мілінкевіча Віктара Сырыцы з ордэрам на ператрус. Паводле міліцыянтаў, яны шукалі злачынцу, які скраў жаночую торбу. Як паведамляе “Радыё Свабода”, у выніку ператрусу ў Віктара Сырыцы нібыта знайшлі некалькі баявых патронаў, і на гэтай падставе актывіста затрымалі. З кватэры Віктара Сырыцы таксама зьвезены два кампутары.
Камэнтару адносна затрыманьня ў Віктара Сырыцы ўзяць не ўдалося – ягоны мабільны тэлефон не адказвае. Актывіст з Баранавіч Уладзімір Гундар не выключае, што патроны ў кватэру Сырыцы былі падкінутыя. Спадар Гундар мяркуе, што прычына перасьледу палягае ў грамадзянская пазыцыі Віктара Сырыцы.
“За актыўную палітычную і грамадзкую дзейнасьць і таму, што яны яго не зламалі. Пасьля прэзыдэнцкай выбарчай кампаніі яго выклікалі ў выканкам і прапаноўвалі быць дырэктарам краязнаўчага музэя, але пры ўмове, што падпіша паперу і ня будзе займацца палітычнай дзейнасьцю. Але ён ад гэтых прапаноў адмовіўся і фактычна цяпер без працы”, -- паведаміў Гундар.
Начальнік баранавіцкай міліцыі Юры Сьняжко адмовіўся камэнтаваць затрыманьне Віктара Сырыцы.
