Пратэстанты зноў ідуць у суд :: Хартыя'97 :: Навiны

22 снежня ў 11.00 суддзя Вышэйшага гаспадарчага суду Кацярына Караткевіч пачне разгляд пазову менскай царквы “Новае жыццё” Аб’яднання суполак грамадзянаў поўнага Евангелля Рэспублікі Беларусь аб прызнанні пазапраўным рашэння Менскага гарвыканкама аб пазбаўленні царквы зямлі і будынка.

Як паведаміў БелаПАН юрыст царквы Сяргей Луканін, аб гэтым стала вядома 18 снежня з пастановы ВГС, якая прыйшла па пошце ў офіс суполкі. У пастанове гаворыцца, што суд лічыць канчатковай падрыхтоўку справы дасудовага разбіральніцтва.

Па словах юрыста, папярэдняе судовае паседжанне па справе, якое адбылося 7 снежня, паказала, што “Менскі гарвыканкам абсалютна не змяніў сваю агрэсіўную пазіцыю ў дачыненні царквы, а суддзя ВГС Кацярына Караткевіч жадае высвятліць чыннікі сітуацыі, у якой апынулася рэлігійная суполка”. С.Луканін адзначыў, што паводле заканадаўства справа павінна быць разгледжаная да 7 снежня.

Нагадаем, увосень мінулага года суполка падала ў гаспадарчы суд Менска пазоў аб прызнанні пазапраўным рашэння Менскага гарвыканкама ад 17 жніўня 2005 года аб пазбаўленні царквы зямлі і будынкі па вуліцы Кавалёва, 72 у сталічным мікрараёне Сухарава. Сваім рашэннем ад 27 кастрычніка 2005 года суддзя Гаспадарчага суду Менска Аляксандр Карамышаў адмовіўся задаволіць скаргу царквы і прызнаў законнымі дзеянні гарадскіх улад. Пасля пачатку пратэстантамі галадоўкі пратэсту старшыня ВГС Віктар Каменкоў 26 кастрычніка цяперашняга года апратэставаў рашэнне А.Карамышава па справе царквы “Новае жыццё” і прапанаваў яшчэ раз разгледзець гэтае пытанне ў прэзідыўме Вышэйшага гаспадарчага суду. Сваёй пастановай ад 4 лістапада прэзідыўм Вышэйшага гаспадарчага суду задаволіў пратэст старшыні ВГС Віктара Каменкова на рашэнне суддзі гаспадарчага суду Менска А.Карамышава ад 27 кастрычніка 2005 года.