У Чарнігаве падпісаная ўстаноўчая дамова аб стварэнні Саюза левых партый Беларусі :: Хартыя'97 :: Навiны

Лідэры Партыі камуністаў Беларускай (ПКБ), Беларускай сацыял-дэмакратычнай партыі (Грамада) і Беларускай жаночай партыі “Надзея” падпісалі ў Чарнігаве ўстаноўчую дамову аб стварэнні Саюза левых партый. Гэта вынік устаноўчай канферэнцыі па стварэнні новага палітычнага аб`яднання, якая адбылася 17 снежня.

Дэкларацыя аб стварэнні Саюза левых партый была падпісаная 22 лістапада. Устаноўчую канферэнцыю першапачаткова планавалася правесці ў Менску, аднак узніклі праблемы з памяшканнем, і арганізатары вырашылі правесці мерапрыемства ва Украіне.

Як паведаміў БелаПАН прэс-сакратар ПКБ Сяргей Вазняк, апроч падпісання дамовы аб стварэнні Саюза левых партый дэлегаты прынялі статут аб`яднання, праграмную заяву і заяву ў падтрымку экс-кандыдата ў прэзідэнты, лідэра БСДП (Грамада) Аляксандра Казуліна. Па рашэнні канферэнцыі А.Казулін абвешчаны ганаровым старшынёй Саюза левых партый. Такой пасады няма ў статуце, але рашэнне было прынятае “у знак павагі да барацьбы гэтага чалавека, які знаходзіцца за кратамі”, растлумачыў Вазняк.

Сустаршынямі саюза сталі лідэры трох партый: ПКБ – Сяргей Калякін, БСДП (Грамада) – Анатоль Ляўковіч (выканаўца абавязкаў старшыні партыі ў адсутнасці Казуліна), жаночай партыі – Алена Яськова. Чацвёртым сустаршынёй стаў Аляксандр Бухвостаў – кіраўнік аргкамітэта па падрыхтоўцы 2-га Кангрэса дэмакратычных сілаў. У склад Цэнтральнага савета на партытэтнай аснове ўвайшоў 31 чалавек, у склад кантрольна-рэвізійнай камісіі – чатыры.

Па заканчэнні канферэнцыі адбылося першае паседжанне Цэнтральнага савета Саюза левых партый.