Генерала Фралова ў дэпутаты не пусцілі :: Хартыя'97 :: Навiны

Былы дэпутат Вярхоўнага Савета Уладзімір Нісцюк і вядомы праваабаронца Алег Воўчак зарэгістраваныя кандыдатамі ў дэпутаты мясцовых выбараў ад Беларускай сацыял-дэмакратычнай партыі (Грамада). Не прайшоў рэгістрацыю экс-дэпутат “палаты прадстаўнікоў”, адзін з лідэраў групы “Рэспубліка” Валерый Фралоў. Афіцыйным чыннікам адказу стала “дрэнная якасць пададзеных у выбарчую камісію подпісаў”, адзначыў У.Нісцюк.

Каментуючы БелаПАН ход выбарчай кампаніі, У.Нісцюк, які балатуецца па Жудроўскай выбарчай акрузе № 35, заявіў: “Выбары нічога новага не дэманструюць. Цяперашнія выбары адрозніваюцца ад мінулых тым, што дэмакратычныя сілы ставяцца да іх вельмі спакойна і не ўспрымаюць іх са ўсёй сур’ёзнасцю”.

Па меркаванні Нісцюка, адмоўным бокам кампаніі з’яўляецца той момант, што збор подпісаў за кандыдатаў у дэпутаты ад партый дэмакратычнай кааліцыі быў сумешчаны са зборам подпісаў для вылучэння дэлегатаў на другі Кангрэс дэмакратычных сілаў. “Шматлікія кандыдаты пасля збору подпісаў на кангрэс знялі свае кандыдатуры. Такім чынам, грамадзяне, якія аддалі свае подпісы за дэмакратычных кандыдатаў, былі пакрыўджаныя”, – адзначыў У.Нісцюк.

Як паведаміў выканаўца абавязкаў старшыні БСДП (Грамада) Анатоль Ляўковіч, колькасць зарэгістраваных кандыдатаў ад партыі стане вядома ў самыя блізкія дні.