Напярэдадні мясцовых выбараў вну будуць узмацняць ідэалагічна :: Хартыя'97 :: Навiны

Аляксандр Лукашэнка заявіў аб неабходнасці паляпшэння ў вышэйшых навучальных установах працы па фармаванні светапогляду студэнтаў. “Перад вну пастаўленая задача ўдасканалення зместа падрыхтоўкі кадраў вышэйшай кваліфікацыі, фармавання канструктыўнага светапогляду ў студэнцкай моладзі”, – заявіў ён у аўторак у Менску падчас нарады з сябрамі Рэспубліканскага савета рэктараў вышэйшых навучальных устаноў Беларусі.

А.Лукашэнка паставіў перад рэктарам пытанне: “Ці атрымалася дамагчыся больш высокай якасці грамадазнаўчай падрыхтоўкі на аснове прынцыпаў дзяржаўнай ідэалогіі? Або ўсе рэфармаванні абмежаваліся фармальным скарачэннем гадзін і паніжэннем выхаваўчага эфекта працэса навучання?”

Лукашэнка лічыць, што сёння “напярэдадні важнай грамадска-палітычнай кампаніі – выбараў у мясцовыя Саветы дэпутатаў, трэба прааналізаваць эфектыўнасць усёй ідэалагічнай і выхаваўчай працы ва ўстановах адукацыі”. “Як забяспечаная каардынацыя працы рэктараў, прарэктараў, дэканаў, куратараў і “пяршовак” Беларускага рэспубліканскага саюза моладзі? Ці не занадта вну захапіліся фармальным бокам справы ў шкоду індывідуальнаму падыходу да кожнага студэнта?”, – спытаў А.Лукашэнка. Ён таксама звярнуў увагу на праблемы кадравага забеспячэння беларускіх вну.

“Як мне дакладалі, паменшылася колькасць выкладчыкаў, у якіх ёсць вучоная ступень і званні, а ў маладых адмыслоўцаў паніжаецца інтарэс да навуковай кар’еры і выкладчыцкай працы”, – сказаў ён.

Лукашэнка таксама заявіў, што яго “заўсёды насцярожвалі навацыі ў адукацыі”. “А што было дрэннага ў савецкай сістэме адукацыі?”, – сказаў ён. “Добра, што мы спыніліся своечасова і ўсё не зруйнавалі, як гэта адбылося ў Расеі”, – падкрэсліў ён.

А.Лукашэнка таксама выказаў сумненні ў правільнасці школьных праграм. “Стаўлю пэўнае пытанне: “Што адбываецца ў нашай школе, ці не занадта мы задушылі дзяцей і ці не з`яўляюцца занадта складанымі праграмы”, – сказаў ён.