Паплечніка Мілінкевіча вызвалілі, але канфіскаваную тэхніку не вярнулі :: Хартыя'97 :: Навiны

У Баранавічах (Берасцейская вобласць) 18 снежня быў затрыманы актывіст ініцыятыўнай групы ў падтрымку Аляксандра Мілінкевіча на прэзідэнцкіх выбарах, старшыня гарадскога аддзялення грамадскага аб’яднання “Таварыства беларускай мовы імя Францішка Скарыны” (ТБМ) Віктар Сырыца.

Як паведаміў БелаПАН В.Сырыца, прыкладна ў 14.30 на дамашні тэлефон яму паталефанаваў невядомы і, назваўшы яго імя і імя па бацьку, паклаў слухаўку. Праз 20 хвілін у кватэру прыйшлі шэсць чалавек, трое з якіх былі ў форме супрацоўнікаў міліцыі, і прад’явілі пастанову на ператрус, падпісаную намеснікам пракурора горада.

– Мне растлумачылі, што знікла жаночая сумачка і ёсць інфармацыя, што яна знаходзіцца ў маім доме. Супрацоўнікі міліцыі правялі ў кватэры ператрус. Сумачка, зразумела, знойдзеная не была. Затое ў шафе сярод бялізны яны “знайшлі” 20 баявых патронаў. Няма сумнення, што мне іх падкінулі, – заявіў В.Сырыца.

Паводле яго, падчас ператрусу ў яго канфіскавалі два кампутарных сістэмных блока, усе дыскі і дыскеты, пячатку ТБМ, літаратуру, якая датычыцца як грамадскага аб’яднання, так і выбараў у мясцовыя саветы, значкі дэмакратычнага руху “За свабоду!”, зварот А.Мілінкевіча да грамадзянаў.

– Прыкладна а 18 гадзіне мяне даставілі ў аддзяленне міліцыі, дзе я прабыў каля гадзіны. У справе аб сумачцы я праходжу як сведка, з падкінутымі мне патронамі яшчэ будзе разбіральніцтва. Лічу, што пошукі сумачкі сталі толькі падставай для правядзення ў маёй кватэры ператрусу, – сказаў В.Сырыца.