Лукашэнка: «Мы занадта шыкоўна жывем без нафты і газу» :: Хартыя'97 :: Навiны

Лішнія структурныя звёны ў бюджэтных арганізацыях у самы блізкі час павінны быць ліквідаваныя. Аб гэтым заявіў сёння Аляксандр Лукашэнка падчас паседжання з сябрамі Рэспубліканскага савета рэктараў вышэйшых навучальных устаноў. Па яго словах, адпаведная задача пастаўленая віцэ-прэм`еру, які курыруе гэтыя пытанні. “Гэта будзе зроблена па ўсіх бюджэтных арганізацыях, і не толькі па бюджэтных. Мы занадта шыкоўна жывем, не маючы практычна ў краіне ні нафты, ні газу. У сістэме адукацыі, а можа, і аховы здароўя, мы жывем не па сродках”, – падкрэсліў кіраўнік дзяржавы.

Падчас размовы з рэктарамі вну Аляксандр Лукашэнка звярнуў увагу на сітуацыю з размеркаваннем і замацаваннем выпускнікоў у рэгіёнах, падрыхтоўку адмыслоўцаў у адпаведнасці з рэальнымі запатрабаваннямі эканомікі.

Лукашэнка закрануў пытанні ўдасканалення падрыхтоўкі кадраў вышэйшай кваліфікацыі, фармавання канструктыўнага светапогляду ў студэнцкай моладзі, цікавіўся якасцю грамадазнаўчай падрыхтоўкі на аснове прынцыпаў дзяржаўнай ідэалогіі.

Напярэдадні важнай грамадска-палітычнай кампаніі – выбараў у мясцовыя Саветы дэпутатаў, адзначыў кіраўнік дзяржавы, важна прааналізаваць эфектыўнасць усёй ідэалагічнай і выхаваўчай працы ва ўстановах адукацыі. “Ці не занадта вну захапіліся фармальным бокам справы ў шкоду індывідуальнаму падыходу да кожнага студэнта?”, – задаў пытанне Лукашэнка.