Мясцовыя выбары – маргінальная падзея? :: Хартыя'97 :: Навiны

Выбары ў мясцовыя саветы дэпутатаў з’яўляюцца “маргінальнай падзеяй”. Такую заяву зрабіў 21 снежня падчас прэзентацыі медыа-маніторынгу “Асвятленне мясцовых выбараў 2007 года ў беларускіх СМІ” куратар гэтага праекту Алесь Анціпенка, засноўваючыся на дадзеных маніторынгу. Прэзентацыя адбывалася ў офісе грамадскага аб`яднання “Беларуская асацыяцыя журналістаў”.

Паводле А.Анціпенкі, у перыяд з 4 па 16 снежня, калі адбывалася рэгістрацыя кандыдатаў у дэпутаты, усе СМІ – дзяржаўныя і недзяржаўныя – не надалі асаблівай увагі выбарчай кампаніі. У іх асвятленні выбары выглядалі руціннай дзейнасцю, а не важнай палітычнай падзеяй. У пацверджанне сваіх слоў А.Анціпенка прывёў дадзеныя маніторынгу праграмы “Панарама” на Першым канале. Па яго словах, Лукашэнка займаў у гэты перыяд 44% эфірнага часу (15 мін. 12 сек.), прысвечанага выбарам, у параўнанні з астатнімі суб`ектамі маніторынгу. ЦВК быў другім па значнасці (38%, або 12 мін. 34 сек.). Разам з тым з агульнага часу праграмы ЦВК заняў усяго толькі 2,6%. Яшчэ адзін суб`ект выбарчага працэсу – апазіцыя – альбо зусім ігнараваўся дзяржаўнымі СМІ, альбо атрымоўваў трохі ўвагі ў недзяржаўнай прэсе.

Ва ўсіх СМІ, адзначыў А.Анціпенка, прысутнічаюць толькі два палітычных акцёра – Лукашэнка і мясцовыя ўлады, хоць ім надаецца не вельмі шмат увагі. Разам з тым, калі ў незалежнай прэсе іх прэзентуюць нейтральна або негатыўна, то ў дзяржаўных СМІ – станоўча альбо нейтральна.