Нават у кабельных сетках НТВ заменіць канал «НТВ-Беларусь» :: Хартыя'97 :: Навiны

У новым годзе расейскі тэлеканал НТВ знікне таксама з сеткі вяшчання кабельных каналаў. “Мы атрымалі адпаведны ліст з Міністэрства інфармацыі, – распавёў “КП в Беларуси” генеральны дырэктар “Космос ТВ” Віктар Кірылаў. – Са студзеня нас абавязалі браць для трансляцыі сігнал, які распаўсюджвае БТ. Наколькі я ведаю, гэты загад закране ўсіх кабельных аператараў”.

Яшчэ летась Белтэлерадыёкампанія атрымала эксклюзіўныя правы на наземнае эфірнае вяшчанне НТВ на тэрыторыі Беларусі, і ў выніку замест расейскага НТВ гледачы атрымалі НТВ-Беларусь. Але акрамя звычайнага, эфірнага тэлебачання ёсць яшчэ і кабельнае, якое прымае сігнал звычайнага расейскага НТВ са спадарожніка. Канал рэйтынгавы, апытанне абанентаў “Космас ТВ” у Менску ў кастрычніку гэтага года паказала, што папулярней за яго няма.

Каб не пакінуць гледачоў без любімага канала, а сябе без гледачоў, кабельныя аператары будуць шукаць альтэрнатыву. Кампанія “Космас ТВ” ужо вядзе перамовы аб тым, каб адначасова з НТВ-Беларусь запусціць па сетках і ў эфір канал НТВ- Мир.

З 25 снежня тэлеканал НТВ-Беларусь павялічвае агульны час вяшчання. Зараз перадачы будуць пачынацца ў 8.00. Беларускія тэлегледачы атрымаюць магчымасць глядзець праграму НТВ “Сегодня утром”, якая раней не транслявалася. Сканчацца трансляцыя будзе ў 24.00, а ў пятніцу-нядзелю – за поўнач. Дзённага перапынку, які быў у сетцы з панядзелка па чацвер, больш не будзе.