Філарэт хоча, каб праваслаўе вывучалі ў школах і вну, і просіць ільготныя тарыфы на энергарэсурсы :: Хартыя'97 :: Навiны

Кіраўнік Беларускай праваслаўнай царквы мітрапаліт Філарэт выступае за больш паглыбленае вывучэнне пытанняў рэлігіі ва ўстановах адукацыі і звяртае ўвагу на вывядзенне рэлігіязнаўства з пераліку абавязковых дысцыплін у беларускіх вну. “Сёння мы назіраем вывядзенне рэлігіязнаўства з пераліку абавязковых гуманітарных дысцыплінаў у карысць адмысловых. Але ў Еўропе, дзе прытрымваюцца Балонскага працэсу ў адукацыі, існуюць урокі рэлігіі, на якіх знаёмяцца з традыцыйнай для той або іншай краіны рэлігіяй”, – заявіў мітрапаліт Філарэт у чацвер на сустрэчы сяброў Сінода БПЦ з Аляксандрам Лукашэнкам.

Па меркаванні кіраўніка БПЦ, “у Беларусі трэба казаць аб рэлігіі, распавядаць аб псеўдарэлігіі, рэлігійным экстрэмізме, сектанцтве”. Акрамя таго, мітрапаліт агучыў прапанову “педагагічнай карпарацыі” аб неабходнасці прызнання дзяржавай дыпломаў у вучоных ступеняў у вобласці тэалогіі.

Мітрапаліт звярнуў таксама ўвагу кіраўніка дзяржавы на шэраг фінансава-эканамічных пытанняў, якія датычацца дзейнасці БПЦ. Ён канстатаваў, што “урад зацягвае рашэнне шэрагу пытанняў”. У прыватнасці, па словах кіраўніка БПЦ, “дагэтуль не зацверджаны пералік прадметаў царкоўнага прызначэння, назіраецца пазапраўнае выкарыстанне царкоўных сімвалаў”. “Без царкоўнага блаславення камерцыйнымі структурамі рэалізуецца прадукцыя царкоўнага прызначэння”, – сказаў мітрапаліт.

Акрамя таго, ён прапанаваў разгледзець пытанні “аб вылучэнні зямельных участкаў для некаторых менскіх прыходаў, падаванні льготных тарыфаў на энергарэсурсы для сельскіх прыходаў і вырашыць праблему запазычанасці па падатку на зямлю”.