Знік асабісты казначэй Ніязава :: Хартыя'97 :: Навiны

Эксперт па Цэнтральнай Азіі Аркадзь Дубноў заяўляе, што напярэдадні смерці Сапармурата Ніязава з Ашхабада знік ягоны асабісты казначэй Аляксандр Жадан. “Па маёй інфармацыі, увечар напярэдадні смерці Ніязава з Ашхабада знік ягоны асабітсы пасцельнічы Аляксандр Жадан, а разам з ім зніклі вельмі важныя дакументы”, – сказаў Дубноў у пятніцу на прэс-канферэнцыі ў РІА «Новости». Па словах эксперта, Жадан пры жыцці Туркменбашы кантраляваў усе фінансавыя выдаткі дыктатара.

Жадан займаў пост намесніка кіраўніка справамі апарата прэзідэнта Туркменістана і адказваў за забеспячэнне кіраўніка дзяржавы ўсім неабходным. Ён лічыўся адным з самых непрыкметных, але вельмі ўплывовых людзей у асяроддзі Туркменбашы, і прапрацаваў разам з ніязавым каля 20 гадоў. Яны звалі адзін аднаго па імі і былі сябрамі.

Ніязаў, які кіраваў у Туркменістане больш за 20 гадоў, сканаў рана раніцай 21 снежня з-за раптоўнага спынення сэрца. Ён будзе пахаваны ў нядзелю, 24 снежня, у сяле Кіпчак, у маўзалею, узведзеным ля сценаў Мячэці духоўнасці.