Разгляд пазову царквы «Новае жыццё» зноў перанесены :: Хартыя'97 :: Навiны

Паседжанне Вышэйшага Гаспадарчага суду, на якім разглядалася іскавая заява царквы “Новае жыццё” аб прызнанні пазапраўным рашэння Менгарвыканкама аб пазбаўленні царквы права карыстацца зямлёй з далейшым прымусовым выкупам будынка, адбылося сёння, 22 снежня, у Менску.

На суддзе прысутнічалі прадстаўнікі царквы “Новае жыццё”, фонду “Менгармаёмасць”, Аддзела па справах рэлігій і нацыянальнасцяў Менгарвыканкама і Камітэта па архітэктуры і горадабудаўніцтву Менгарвыканкама.

Царквой “Новае жыццё” былі заяўленыя дадатковыя іскавыя патрабаванні, якія былі часткова задаволеныя судом, сярод іх – дапытаць у якасці сведкаў па дадзенай справе начальніка Аддзела па справах рэлігій і нацыянальнасцяў Менгарвыканкама Рабіцаву А.Н., а таксама спагнаць з Менгарвыканкама суму панесеных царквой страт у выглядзе дзяржпошліны, якую яны выплацілі.

У сувязі з заявай дадатковых іскавых патрабаванняў, а таксама ў сувязі з хваробай Ігара Касперовіча, юрысконсульта Камітэта па землеўладкаванні Менгарвыканкама, які прадстаўляе інтарэсы адказчыка па дадзенай справе, суддзя Караткевіч Е. А. вырашыла адкласці разгляд дадзенай справы на іншы тэрмін.

“Сённяшнім рашэннем суду мы задаволеныя часткова. Мы меркавалі, што разгляд па сутнасці будзе перанесены ў сувязі з заяўленымі намі дадатковымі патрабаваннямі. Аднак тое, што два з пяці дадатковых іскавых патрабаванняў былі адхіленыя судом, некалькі не супадае з нашымі планамі, – пракаментаваў вынікі судовага паседжання юрысконсульт царквы Сяргей Луканін. – Зараз нам прыйдзецца вырашаць гэтыя пытанні ў рамках дадатковых судовых працэсаў”.