Праваабаронцы патрабуюць вызваліць усіх туркменскіх палітвязняў :: Хартыя'97 :: Навiны

Міжнародныя праваабарончыя арганізацыі заклікалі новыя ўлады Туркменістана вызваліць усіх палітвязняў і журналістаў, якія трапілі ў турмы за гады кіравання Сапармурата Ніязава, паведамляе Радыё “Свабода”. Па дадзеных туркменскай Хельсінкскай групы, у цяперашні час у рэспубліцы налічваеца каля чатырох тысяч палітвязняў.

Нагадаем, што ў ноч на 21 снежня ў Ашхабадзе на 67-ым годзе жыцця сканаў дыктатар Туркменістана Сапармурат Ніязаў. Чыннікам смерці стала раптоўнае спыненне сэрца.

Туркменбашы кіраваў краінай з 1985 года, а ў 2005 годзе дэпутаты Народнага савета Туркменістана прызначылі Ніязава пажыццёвым прэзідэнтам.

У чацвер на экстраным сходдзе кабінета міністраў краіны і дзяржаўнага савета бяспекі Туркменістана часовым выканаўцай абавязкаў прэзідэнта рэспублікі быў прызначаны віцэ-прэм’ер, міністр аховы здароўя Гурбангулы Бердымухамедаў. Ён ужо ўзначаліў камісію па арганізацыі пахавання Ніязава.

Паводле заканадаўства Туркменістана абавязкі прэзідэнта павінен быў выконваць старшыня парламента Авезгельды Атаеў, аднак удзень ён быў узяты пад варту. Як абвясціў Бердымухамедаў, супраць Атаева Генпракуратурай Туркменістана ўзбуджаная крымінальная справа.

Увечар 21 снежня, выступаючы ў эфіры нацыянальнага тэлебачання, в.а. прэзідэнта паабяцаў працягнуць палітычны курс Туркменбашы. “Туркменістан працягне палітыку нейтралітэту Сапармурата Туркменбашы Вялікага, заснаваную на прынцыпах добрасуседства, узаемнай павагі бакоў, раўнапраўя і ўзаемавыгаднага супрацоўніцтва з усімі дзяржавамі свету. Краіна працягне выкананне сваіх міжнародных абавязальніцтваў у рамках Рэзалюцыі Арганізацыі Аб`яднаных Нацый, двухбаковых і шматбаковых пагадненняў з удзелам Туркменістана, дамоў, канвенцый”, – заявіў ён.