Выбары прэзідэнта Туркменістана прызначаныя на 11 лютага 2007 года :: Хартыя'97 :: Навiны

Народны Савет (Халк Маслахаты) Туркменістана аднагалосна прыняў закон аб занясенні зменаў у Канстытуцыю краіны. Прыняты канстытуцыйны закон “Аб выбарах прэзідэнта”. Сябры Народнага Савета прагаласавалі за папраўку, паводле якой кандыдатам у прэзідэнты Туркменістана можа стаць грамадзянін краіны пры падтрымцы адной траціны галасоў Народнага Савета.

Выбары кіраўніка дзяржавы прызначаныя на 11 лютага 2007 года. “Народ, як яму скажуць і прызначаць час, – прыйдзе. Усе яны сумленныя і шчырыя людзі. Выбары будуць сумленнымі і адкрытымі, нам няма чаго таіць”, – заявіў старшыня ЦВК Туркменістана Муран Каррыеў. Функцыі прэзідэнта Туркменістана на 60 дзён адыйдуць да віцэ-прэм’ера ўрада Гарбангулы Бердымухамедава.

Ужо названыя тры кандыдатуры на пост прэзідэнта Туркменістана: Ішангулы Нурыеў – намеснік міністра нафтагазавай прамысловасці і мінеральных рэсурсаў, а таксама Дурды Дурдыеў – намеснік міністра па турызме і спорце. Адзіным кандыдатам ад апазіцыі на пост прэзідэнта Туркменістана ў аўторак абраны лідэр грамадска-палітычнага руху Watan (“Радзіма”) Худайберды Аразаў. “Так, я магу пацвердзіць гэтую інфармацыю”, – заявіў Аразаў “Інтэрфаксу” па тэлефоне.

Аразаў адзначыў, што зараз знаходзіцца ў Швецыі, але мае намер абавязкова вярнуцца ў Туркменістан. “Зараз складана казаць, калі менавіта я паеду ў Туркменістан, але гэта адбудзецца ў самай блізкай будучыні” , – сказаў лідэр руху Watan.

У сваю чаргу, старшыня Рэспубліканскай партыі Туркменістана Нармухамед Ханамаў пацвердзіў, што Аразаў абраны адзіным апазіцыйным кандыдатам. “Так, гэта сапраўды. Мы спыніліся на кандыдатуры Аразава”, – сказаў ён.

Ханамаў выказаў надзею, што дзеючыя туркменскія ўлады атрымаецца ўпэўніць у тым, каб прадстаўнікі апазіцыі былі дапушчаныя да выбараў. “Мы заклікаем міжнародную супольнасць, каб яна аказала садзейнічанне, і выбары, якія маюць быць у лютым, былі дэмакратычнымі і прайшлі пад кантролем міжнародных назіральнікаў", – падкрэсліў Ханамаў.

Гаворачы аб кроках апазіцыі ў выпадку перамогі на выбарах, ён паведаміў, што ў іх уваходзіць роспуск урада і парламента. “Будзе дзейнічаць часовы ўрад. Ён будзе функцыянаваць датуль, пакуль не будуць занесеныя змены ў Канстытуцыю, якая раней была зробленая пад аднаго чалавека”, – адзначыў Ханамаў.

Закрануўшы тэму энергетычнага супрацоўніцтва туркменістана з іншымі краінамі, Ханамаў падкрэсліў: “Усе наяўныя доўгатэрміновыя пагадненні застаюцца ў сіле”.

Народны Савет ужо пачаў зацвярджаць кандыдатаў на пасаду прэзідэнта краіны. Галасы падлічваюцца ўручную. 121 сябар Злічальнай камісіі ў зале падлічваюць паднятыя рукі. Па працэдуры за кандыдата павінна прагаласаваць адна траціна з тых 2466 чалавек, якія зараз прысутнічаюць. Такая карціна выбараў упершыню назіраецца падчас паседжанняў Народнага Савета. У бытнасць прэзідэнта Ніязава ўсе рашэнні прымаліся аднагалосна.

Працэдура вылучэння і зацвярджэння кандыдатаў зойме некаторы час, бо іх будуць высоўваць прадстаўнікі пяці абласцей, сталіцы Ашхабада і руху адраджэння Агульнанацыянальнага руху “Галкыныш”. Мяркуецца, кожны з іх будзе высоўваць па два кандыдаты.