Цімафей Дранчук выйшаў на волю :: Хартыя'97 :: Навiны

Актывіст кампаніі па назіранні за выбарамі “Партнёрства”, палітвязень Цімафей Дранчук сёння быў вызвалены з выпраўленчай калоніі №1 г.Менска. Аб гэтым прэс-цэнтру Хартыі’97 паведаміў бацька палітвязня Валерый Дранчук.

Грамадскага актывіста вызвалілі ўдосветку. Яго не змаглі сустрэць сябры і сваякі, бо супрацоўнікі калоніі паведамлялі, што Дранчука вызваляць не раней абеду.

Сёння ж Цімафей Дранчук мае намер даць прэс-канферэнцыю па адрасе: вул.Якуба Коласа, 4 (тэлефон для даведак 8 029 656 66 70).

Нагадаем, што Ц.Дранчук і яшчэ тры актывіста “Партнёрства” былі затрыманыя 21 студзеня. У жніўні суд Цэнтральнага раёна Менска прызнаў іх вінаватымі па артыкуле 193-1 Крымінальнага кодэкса (удзел у дзейнасці незарэгістраванага грамадскага аб`яднання). Шэраг абвінавачванняў у адрас актывістаў “Партнёрства”, агучаных высокімі службовымі асобамі напярэдадні прэзідэнцкіх выбараў (фальсіфікацыя вынікаў экзіт-полу, падрыхтоўка тэрактаў і інш.), не знайшлі пацверджання ні падчас следстваў, ні ў судзе. У выніку Мікалай Астрэйка быў прысуджаны да двух гадоў пазбаўлення волі, Цімафей Дранчук – да аднаго года пазбаўлення волі, Эніра Браніцкая і Аляксандр Шалайка – да шасці месяцаў арышту. Браніцкая і Шалайка выйшлі на волю 21 жніўня. 17 лістапада з калоніі ў Шклове быў вызвалены М.Астрэйка, якому змянілі пакаранне на выпраўленчыя працы. Цімафей Дранчук быў вызвалены ўмоўна-датэрмінова.