У Літвы ёсць запасны варыянт на выпадак адключэння газу Беларусі :: Хартыя'97 :: Навiны

Кіраўнікі парламента і ўрада Літвы спадзяюцца, што магчымае спыненне паставак газу з Расеі ў Беларусь не прычыніць праблем спажыўцам гэтага паліва ў Літве. “Думаю, што гэта на Літву не паўплывае, бо на такі выпадак у нас маецца запасны варыянт забеспячэння газам”, – сказаў старшыня сойма Віктарас Мунцянас (Viktoras Muntianas) у сераду ў інтэрв’ю прыватнаму радыё Ziniu radijas (“Радыё навін”).

Такім запасным варыянтам, па словах кіраўніка парламента, былі б пастаўкі газу праз Латвію. “Там ёсць сховішча газу, ад гэтага тэрмінала мы маем газаправод, і ёсць улік колькасці газу, які пастаўляецца, на мяжы”, – сказаў В. Мунцянас.

У сваю чаргу прэм’ер-міністр Літвы Гедымінас Кіркілас (Gediminas Kirkilas), каментуючы напярэдадні ўвечар журналістам магчымасць спынення паставак газу з РФ у Беларусь, адзначыў, што “на такі выпадак Літва падрыхтаваная – у нас ёсць запас газу”, – перадае “Інтэрфакс”.

Г.Кіркілас не ўдакладніў аб’ёмы запасаў, спасылаючыся на канфідэнцыяльнасць інфармацыі. “Але магу сказаць, што ён дастатковы для таго, каб на час магчымага крызісу запатрабаванні былі пакрытыя”, – сказаў кіраўнік урада.

Акрамя таго, па словах Г.Кіркіласа, кіраўнікі літоўскай кампаніі па імпарце і транспартоўцы газу Lietuvos dujos запэўнілі яго, што пакуль яны не назіраюць якіх-небудзь прыкмет магчымага прыпынення паставак газу праз Беларусь у Літву.

“Урад не мае звесткаў аб тым, што з 1 студзеня могуць быць спыненыя пастаўкі газу. Мы назіраем за сітуацыяй, кансультуемся з газавікамі, такіх дадзеных у нас няма”, – паведаміў прэм`ер BNS.

Ён дадаў, што калі ўсе ж пастаўкі газу спыняцца, то Літва будзе разлічваць на газасховішчы ў Латвіі і шукаць іншыя выхады.

У Літве на інфармацыю аб магчымым спыненні паставак газу ў Беларусь рэагуюць даволі востра, бо ў лютым 2004 года з-за спынення паставак газу ў Беларусь і ў Літве склалася напружанае становішча – газ пастаўляўся толькі праз Латвію, і запатрабаванні Літвы ў газе задавальняліся толькі прыкладна на 30%.