Чалавек, які стаў сімвалам :: Хартыя'97 :: Навiны

Яшчэ год таму мала хто ведаў пра палітыка Аляксандра Мілінкевіча, а сёння ён сімвалізуе імкненне да дэмакратыі і еўрапейскай будучыні сотняў тысяч грамадзянаў Беларусі, лічыць газета “Беларусы і рынак”.

А. Мілінкевіч здолеў “раскруціцца” у неспрыяльных умовах інфармацыйнай блакады і палітычнага ціску. Яго выбаршчыкі, нягледзячы на запалохванне смяротнай карай, выйшлі на плошчу абараняць свой выбар.

Па меркаванні выдання, феномен А. Мілінкевіча ў тым, што гэты палітык выглядаў увасабленнем тых якасцяў, па якіх ужо знудзіўся беларускі выбаршчык і якія зусім не ўласцівыя цяперашняму беларускаму кіраўніцтву: правільнае маўленне, свабоднае валоданне беларускай мовай і веданне некалькіх замежных, мяккасць і талерантнасць, шляхецкае паходжанне і шляхетныя паводзіны, навуковыя дасягненні. Па-еўрапейску арыентаваны выбаршчык убачыў у ім палітыка, які можа ўвайсці на роўных у клуб прэзідэнтаў еўрапейскіх краінаў і годна прадставіць у ім краіну, якая знаходзіцца ў цэнтры Еўропы.

За час прэзідэнцкай кампаніі А. Мілінкевіч на сваім старым “Мэрсэдэсе” праехаў па Беларусі больш за 120 тыс. км, пабываў у 60 гарадах, асабіста сустрэўся з 40 тыс. выбаршчыкаў. Людзі, якім не хапала месца ў прадстаўленых уладамі маленькіх памяшканнях, гадзінамі стаялі на вуліцы, каб толькі пачуць і ўбачыць яго, сказаць некалькі слоў, задаць сваё пытанне.

Грамадзянскі ўздым, сімвалам якога стаў А. Мілінкевіч, ахапіў усю краіну. Ён паказаў: Беларусь сёння не тая, што ў сярэдзіне 90-х. У электараце адбыліся тэктанічныя змены: пенсіянерамі сталі “шасцідзесятнікі” – “дзеці ”адлігі”, у жыццё ўступіла шматлікае маладое пакаленне, якое бачыць сваю будучыню ў дэмакратычнай Беларусі.