Еўракамісія заклікала Расею і Беларусь гарантаваць бяспеку паставак газу ў ЕЗ :: Хартыя'97 :: Навiны

Сябра Еўрапейскай Камісіі Андрыс Пібалгс, адказны за энергетыку, заклікаў Расею і Беларусь да хутчэйшага ўрэгулявання газавага канфлікту і абвясціў аб скліканні паседжання Каардынацыйнай групы ЕЗ па газе.

У распаўсюджаным у чацвер камюніке ён падкрэсліў неабходнасць тэрмінова правесці перамовы паміж Расеяй і Беларуссю аб пастаўках газу на наступны год, перадае “Інтэрфакс”.

“Еўрапейская камісія вельмі ўважліва сочыць за сітуацыяй, бо яна можа паўплываць на пастаўкі газу ў Еўропу, – заявіў А.Пібалгс. – Я заклікаю абодва бакі як мага хутчэй дасягнуць задавальняючага пагаднення, якое не ставіла бы пад пытанне газавы транзіт у ЕЗ. У любым выпадку, я вырашыў склікаць 4 студзеня ў Брусэлі Кардынацыйную групу ЕЗ па газе для ацэнкі становішча, якое стварылася”.

Кардынацыйная група па газе (GCG) была створаная ў 2004 годзе адмысловай дырэктывай (2004/67/EC). Яна займаецца выпрацоўкай мераў па бяспецы паставак прыроднага газу. Яна складаецца з прадстаўнікоў краін-удзельніц ЕЗ, прадстаўнікоў адпаведных галін прамысловасці і спажыўцоў газу. У ёй старшынствуе Еўракамісія.

У апошні раз група збіралася 6 кастрычніка ў Брусэлі па просьбе камісара А.Пібалгса і абмяркоўвала забеспячэнне ЕЗ газам у зімовы сезон, у прыватнасці, у святле леташняй праблемы з бяспекай паставак. Тады ў першы раз у яе паседжанні ўдзельнічалі прадстаўнікі Расеі і Украіны, і прадстаўнікі “Газпрома” запэўнілі, што ў цяперашнюю зіму ніякіх праблем з пастаўкамі газу не чакаецца.