Райнер Лінднер: «Сістэма Лукашэнкі, здаецца, вычарпала сябе» :: Хартыя'97 :: Навiны

Супрацоўнік нямецкага інстытута палітычных даследаванняў “Навука і палітыка”, старшыня нямецка-беларускага таварыства Райнер Лінднер пракаментаваў “Нямецкай хвалі” газавы канфлікт паміж Беларуссю і Расеяй і распавёў аб магчымасцях яго вырашэння.

– Як, на Ваш погляд, будуць развівацца падзеі ў далейшым? Ці здолеюць бакі дамовіцца? Якую пазіцыю займаюць у гэтым пытанні краіны Заходняй Еўропы?

– Да заканчэння кантракту засталіся лічаныя дні. Аднак, замест таго, каб дамовіцца, Расея і Беларусь прад`яўляюць адзін аднаму прэтэнзіі. Дзіўна, што ні Расея, ні Беларусь не зацікаўленыя ў кампрамісным рашэнні дадзенага пытання. З аднаго боку, Беларусь не жадае губляць Белтрансгаз, з іншага ж яна хоча працягваць атрымоўваць газ па выгодных цэнах. Расея ж мае намер прыватызаваць Белтрансгаз і атрымаць кантроль над газатранспартнымі сістэмамі, у прыватнасці над нафтаправодам Ямал. Дагэтуль Расея знаходзілася ў прамой залежнасці ад палітычных настрояў у той або іншай суседняй краіне. Зараз канфлікт разрастаецца. Ён можа закрануць і Заходнюю Еўропу, бо прыкладна трэць газу мы атрымоўваем праз Беларусь. Таму Еўразвязу трэба адыграць ролю мадэратара і паспрабаваць дапамагчы ў вырашэнні дадзенага канфлікту.

–Як Вы ацэньваеце заявы Лукашэнкі, што Захад і Расея абвясцілі Беларусі эканамічную вайну?

– Сістэма Лукашэнкі засноўваецца на танных пастаўках энергіі. Дадатковыя сродкі, атрыманыя ад перапрацоўкі і экспарту танных расейскіх энерганосьбітаў, ён інвеставаў у эканоміку, сельскую гаспадарку і размеркаванне прывілеяў. Гэтая сістэма, здаецца, вычарпала сябе. Каб неяк апраўдаць пагаршэнне якасці жыцця, Лукашэнка спрабуе ўпэўніць беларускі народ у тэорыі загавару з боку Расеі і Захаду. Яму, сапраўды, не застаецца нічога іншага, як гаварыць аб тым, што Беларусі абвясцілі вайну. Але прыклад Украіны паказвае, што ніякага камплоту з боку Захаду і Расеі не было.