«Гродна Азот» можа спыніцца ў выпадку спынення падачы газу :: Хартыя'97 :: Навiны

ААТ “Гродна Азот” будзе вымушана цалкам спыніць вытворчасць у выпадку спынення падачы ў Беларусь расейскага газу з 1 студзеня 2007 года, заявіў “Інтэрфаксу” галоўны інжэнер прадпрыемства Андрэй Сіроцін. “Калі падача газу спыніцца, завод таксама спыніцца. Працаваць на паветры мы не можам ”, – сказаў А.Сіроцін.

Ён падкрэсліў, што спыненне вытворчасцяў, шмат з якіх – бесперапыннага цыклу, прывядзе да істотных страт для прадпрыемства.

Паводле А.Сіроціна, “Гродна Азот” з’яўляецца адным з буйнейшых прамысловых спажыўцоў газу ў Беларусі – сярэднегадавы аб`ём спажывання прыроднага газу складае каля 1,5 млрд куб. м. Пры гэтым газ выкарыстоўваецца як сыравіна для вытворчасці асноўнай прадукцыі, так і ў якасці паліва для працы тэхналагічнага абсталявання.

“Прадпрыемства закупляе газ у рамках прамых кантрактаў з ААТ “Газпром”, пастаўкі газу здзяйсняюцца па сістэме трубаправодаў “Белтрансгаза”, – сказаў А.Сіроцін, дадаўшы, што прадпрыемства не мае кантракту на атрыманне газу ў 2007 годзе.

ААТ “Гродна Азот” з’яўляецца манапалістам у вобласці вытворчасці азотных удабрэнняў і капралактаму ў Беларусі. Вытворчыя магутнасці дазваляюць штогод выпускаць 305 тыс. тон сернай кіслаты, 645,7 тыс. тон азотных удабрэнняў, 111,2 тыс. тон капралактаму, 55,4 тыс. тон метанола.