Андрэй Саннікаў: Лукашэнка гатовы «здаць» цэлую дзяржаву :: Хартыя'97 :: Навiны

“Чарговы газавы канфлікт Расеі і Беларусі расставіў акцэнты як у адносінах Беларусі і Расеі, так і ва ўнутранай палітыцы Беларусі. Цалкам відавочна, што ў адрозненні ад папярэдніх канфліктных сітуацый, бакі вызначыліся ў тым, чаго яны жадаюць адзін ад аднаго. Масква знайшла спосаб падпарадкаваць сабе Беларусь без нейкіх фармальных паперак, а Лукашэнка, які спрабаваў усе гэтыя гады гуляць як на сяброўстве з Расеяй, так і на абароне суверэнітэту Беларусі, прадэманстраваў, што дзеля захавання ўлады ён гатовы “здаць” цэлую дзяржаву. Менавіта гэта і адбылося ў навагоднюю ноч. Беларускае кіраўніцтва згадзілася на паўзучую перадачу нацыянальнай уласнасці расейскім алігархам, менавіта ў надзеі захаваць той рэжым, які існуе ў Беларусі”, – заявіў міжнародны каардынатар Хартыі’97, былы намеснік міністра замежных спраў Беларусі Андрэй Саннікаў, каментуючы беларуска-расейскія дамоўленасці па газе.

“Наогул мы пазналі шмат новага падчас гэтага канфлікту, – адзначае Саннікаў. – Напрыклад, што газатранспартная сістэма Ямал-Еўропа цалкам прыналежыць Расеі, уключаючы зямлю пад газаправодам, якая знаходзіцца ў бестэрміновай арэндзе, што, беларускі эканамічны “цуд” не здольны прынесці прыбытак, неабходны для пакрыцця выдаткаў на энерганосьбіты”.

“Мабыць усёткі прыбыткі з бюджэту ідуць не на задавальненне запатрабаванняў народа, а на будаўніцтва віл для службоўцаў, утрымання вялізнага рэпрэсіўнага апарата, масавую вытворчасць новых аўтазакаў для палітвязняў і гэтак далей. Беларускі рэжым ярка прадэманстраваў поўнае сваё банкруцтва і няздольнасць нават у сваіх карыслівых інтарэсах абараніць суверэнітэт краіны”, – лічыць палітык.