ЕЗ абмяркуе расейска-беларускае «газавае» пагадненне :: Хартыя'97 :: Навiны

Паседжанне каардынацыйнай групы Еўрапейскага Звяза па газе, у склад якой уваходзяць урадавыя эксперты, прадстаўнікі кампаній вытворцаў і спажыўцоў энерганосьбітаў з краінаў-сябраў гэтай рэгіянальнай арганізацыі, адбудзецца ў чацвер у Брусэлі. Сустрэча скліканая еўракамісарам па энергетыцы А.Пібалгсам, і яе цэнтральнай тэмай будзе сітуацыя з забеспячэннем ЕЗ расейскім “блакітным палівам” пасля заключэння РФ і Беларуссю двухбаковага пагаднення аб пастаўках і транзіце газу.

“Будзе прааналізаваная сітуацыя пасля заключэння пагаднення”, – заяваіў прэс-сакратар Пібалгса, перадае РІА “Новости”.

Ад імя ЕЗ еўракамісар раней заклікаў Маскву і Менск “як мага хутчэй дасягнуць узаемапрымальнага пагаднення, якое не ставіць пад пытанне транзіт газу ў ЕЗ”.

Пасля дасягнення Газпромам і Беларуссю за дзве хвіліны да Новага года газавага пагаднення ў Еўракамісіі выказалі надзею, што пастаўкі расейскага газу ў Еўропу будуць здзяйсняцца бесперапынна, у адпаведнасці з кантрактамі.

Беларусь у 2007 годзе будзе атрымоўваць расейскі газ па цане $100 грашыма за тысячу кубаметраў.

Вызначаны ўмовы аплаты Газпромам 50% акцый ААТ Белтрансгаз – $2,5 мільярда роўнымі плацяжамі цягам чатырох гадоў. Усе плацяжы будуць здзяйсняцца грашовымі сродкамі.