Расея абураная ўвядзеннем Беларуссю пошлін на нафту :: Хартыя'97 :: Навiны

У Мінэканамразвіцця РФ лічаць, што ўвядзенне Беларуссю пошлін на расейскую нафту, якая транспартуецца праз краіну, супярэчаць дзеючым двухбаковым гандлёва-эканамічным пагадненням. “Гэтыя меры распачатыя беларускім бокам без кансультацый з расейскім бокам, і, па меркаванні Мінэканамразвіцця Расеі, супярэчаць дзеючым паміж Расеяй і Беларуссю гандлёва-эканамічным пагадненням”, – гаворыцца ў паведамленні прэс-службы МЭРГ, якое паступіла ў РІА “Новости” у чацвер.

Урад Беларусі прыняў рашэнне аб увядзенні з 1 студзеня 2007 года мытнай пошліны на нафту, якая транспартуецца па нафтаправодах рэспублікі – на студзень яна ўсталяваная на ўзроўні $45 за тону нафты.

“Такі падыход не мае аналагаў у сусветнай практыцы, бо пошлінай могуць абкладацца толькі тыя тавары, якія або вырабляюцца, або спажываюцца на тэрыторыі краіны, якая прымае рашэнне аб увядзенні пошліны”, – адзначае міністэрства.

Яно нагадвае, што ў адпаведнасці з пагадненнем паміж урадамі Расеі і Беларусі аб свабодным гандлі ад 13 лістапада 1992 года кожны бок павінен забяспечыць бесперашкодны транзіт праз яе тэрыторыю тавараў, якія паходзяць з мытнай тэрыторыі іншага боку.

“Бакі абавязваюцца таксама не ўжываць у дачыненні перавозкі тавараў паходжаннем з іншага боку правілы іншыя за тыя, якія ўжываюцца ў аналагічных выпадках у дачыненні ўласных тавараў або тавараў паходжаннем з трэціх краінаў”, – гаворыцца ў прэс-рэлізе.

У адпаведнасці з пагадненнем аб адзіных умовах транзіту праз тэрыторыі дзяржаў-удзельніц мытнага саюза ад 22 студзеня 1998 года тавары, якія знаходзяцца ў транзіце, вызваляюцца ад выплаты мытных пошлін, падаткаў і збораў за мытнае афармленне, а таксама ад ужывання да тавараў мераў эканамічнай палітыкі, адзначае МЭРГ.

“Мінэканамразвіцця Расеі разлічвае на неадкладнае атрыманне ад беларускіх калегаў інфармацыі аб пэўных тэрмінах прывядзення беларускага заканадаўства ў адпаведнасць з наяўнымі двухбаковымі гандлёвымі пагадненнямі. Абмежаванне свабоды транзіту тавараў можа негатыўна адбіцца на рэалізацыі планаў далейшай інтэграцыі паміж абедзвюма краінамі, у тым ліку планаў фармавання мытнага саюза”, – падкрэсліваецца ў паведамленні.

Раней у чацвер Беларускі дзяржаўны канцэрн “Белнафтахім” заявіў, што афіцыйна апавясціў расейскую кампанію “Транснафта” аб увядзенні з 1 студзеня мытнай пошліны на нафту.

Рашэнне аб увядзенні пошліны было прынятае пасля нарады ў Аляксандра Лукашэнкі ў сераду.

“$45 – гэта абгрунтаваная лічба, яна лёгка пралічваецца, зыходзячы з сусветнага кошту нафты. Гэта абсалютна разлічаны паказчык”, – заявіў напярэдадні прэм`ер-міністр Беларусі Сяргей Сідорскі, кажучы аб увядзенні мытнай пошліны.