Беларуская чыгунка нясе каласальныя страты з-за прастою вагонаў з цукрам :: Хартыя'97 :: Навiны

Беларуская чыгунка нясе вялікія страты з-за прастояў вагонаў з цукрам. За два апошнія месяцы, па дадзеных на 31 снежня 2006 года, страты склалі Br1,3 млрд., альбо $600 тыс., паведаміла карэспандэнту БЕЛТА прэс-сакратарка праўлення Беларускай чыгункі Таццяна Бондарава. Паводле яе, у цяперашні час да адпраўкі ў Расею падрыхтаваныя 210 вагонаў з цукрам. У прыватнасці, 140 вагонаў стаіць у Воршы, 60 – у Магілёве і 10 – у Жабінке.

Аформленыя ўсе неабходныя дакументы, арганізаваная надзейная ахова грузаў. Чыгуначнікі Беларусі, выконваючы дамоўныя абавязальніцтвы перад заказчыкамі – цукровымі заводамі рэспублікі, спадзяюцца на скарэйшае вырашэнне праблем з пастаўкамі цукру ў Расею, падкрэсліла Таццяна Бондарава.

Нагадаем, з 29 кастрычніка 2006 года Федэральная мытная служба РФ спыніла мытнае афармленне беларускага цукру на Траекураўскім мытным пасту. Гэта адбылося насуперак дасягнутай дамоўленасці прэзідэнтаў Расеі і Беларусі вырашыць у самы блізкі час канфліктную сітуацыю па пастаўках беларускага цукру ў РФ. Такім чынам, экспарт цукру з Беларусі на расейскі рынак практычна прыпынены.

Гэтымі днямі з Смаленска ў Воршу былі вернутыя 57 вагонаў з айчынным цукрам. Дзеянні расейскіх чыгуначнікаў накіраваныя на тое, каб не ствараць прастояў вагонаў на тэрыторыі РФ, з-за чаго беларускія вытворцы панеслі бы яшчэ большыя страты. Адмыслоўцы адзначаюць, што прастоі вагонаў з цукрам прыносяць каласальныя страты як чыгуначнікам, так і цукравытворцам. Толькі з-за няўчаснага мытнага афармлення на тэрыторыі Расеі і прастояў вагонаў беларускія перапрацоўчыя прадпрыемствы панеслі страты ў памеры $2 млн.