ЗША рыхтуюць закон у падтрымку энергетычнай незалежнасці маладых дэмакратый :: Хартыя'97 :: Навiны

У першы дзень працы кангрэса ЗША новага склікання дзевяць вядомых сенатараў занеслі ў сенат законапраект пад назовам “Акт аб энергетычнай дыпламатыі і бяспецы”, адным з палажэнняў якога з’яўляецца падтрымка імкнення маладых дэмакратый, у прыватнасці Украіны і Грузіі, да энергетычнай незалежнасці. Як паведамілі РІА Новости ў сакратарыяце сената, сааўтарамі законапраекта выступілі новы старшыня сенацкага камітэта па замежных справах сенатар-дэмакрат Джозаф Байдэн, былы кіраўнік гэтага камітэта, які стаў намеснікам Байдэна, сенатар-рэспубліканец Рычард Лугар, а таксама сенатары-рэспубліканцы Чак Хэгел, Норм Коўлман, Алімпія Сноў, Лэрры Крэйг, сенатары-дэмакраты Мэры Лэндру, Кен Салазар, а таксама незалежны сенатар Джозаф Ліберман.

“Неабходна прасоўваць дэмакратыю ў глабальным маштабе пасродкам партнёрстваў з замежнымі ўрадамі, асабліва з урадамі маладых дэмакратый, такіх як Украіна і Грузія, у іх намаганнях па паніжэнні залежнасці ад імпарту нафты і газу”, – гаворыцца ў законапраекце.

У ім адзначаецца, што “энергетычная бяспека з’яўляецца прыарытэтам для ўрадаў шматлікіх замежных дзяржаў і грае ўсё больш цэнтральную ролю ва ўзаемаадносінах урада ЗША з замежнымі ўрадамі”.

У дакуменце таксама адзначаецца, што запасы нафты і газу сканцэнтраваныя ў невялікай колькасці краін. “Доступ да паставак нафты і газу залежыць ад палітычнай волі краін-вытворцаў”, і “суперніцтва паміж урадамі за доступ да запасаў нафты і газу можа прывесці да палітычнага, эканамічнага і ўзброенага канфлікту”, – адзначаецца ў законапраекце.

“Краіны-экспарцёры нафты рэзка павялічылі свае прыбыткі за кошт глабальных цэнаў, што ўзмацніла магчымасці шэрагу гэтых дзяржаў дзейнічаць у такой манеры, якая пагражае глабальнай бяспецы”, – гаворыцца ў дакуменце.

Законапраект выводзіць пытанні энергетычнай бяспекі ЗША у разрад асноўных прыярытэтаў амерыканскай дыпламатыі на міжнароднай арэне, уводзіць у структуры дзярждэпартамента пасаду каардынатара па пытаннях міжнароднай энергетыкі з прамым падначаленнем дзяржсакратару. Дакумент прадугледжвае рэалізацыю шэрагу міжнародных ініцыятыў, уключаючы выпрацоўку міжнароднага механізму хуткага рэагавання на энергетычныя крызісы, дамоўленасці з урадамі Кітая і Індыі па пытанні аб стварэнні міжнародных стратэгічных запасаў нафты, а таксама стварэнне форума па энергетычным супрацоўніцтве з удзелам дзяржаў заходняга паўшар`я – ЗША, Канады і зацікаўленых краін Лацінскай Амерыкі.

Падкрэсліваючы важнасць міжнароднага супрацоўніцтва ў сферы энергетыкі, дакумент прадугледжвае таксама, што дзяржсакратару і міністру энергетыкі ЗША будзе даручана “неадкладна стварыць або пашырыць стратэгічныя энергетычныя партнёрствы з урадамі дзяржаў, якія з’яўляюцца буйнейшымі пастаўшчыкамі або спажыўцамі энергіі”.

Пры гэтым у законапраекце адзначаецца, што ў такім супрацоўніцтве з ЗША не могуць удзельнічаць “дзяржавы, якім не дазволена атрымоўваць амерыканскую эканамічную або ваенную дапамогу”.