Міліцыя спрабуе сарваць паездкі Мілінкевіча па рэгіёнах :: Хартыя'97 :: Навiны

6 студзеня лідэр аб`яднаных дэмакратычных сілаў, экс-кандыдат у прэзідэнты Беларусі Аляксандр Мілінкевіч пачаў паездкі па краіне ў якасці даверанай асобы кандыдатаў у дэпутаты мясцовых саветаў ад дэмсіл. На гэты дзень у яго былі запланаваныя сустрэчы з выбаршчыкамі Рэчыцы, Гомеля і Добруша. Аднак на працягу дня аўтамабіль лідэра дэмсіл тройчы затрымоўвалі супрацоўнікі міліцыі і ДАІ. 7 студзеня ўсё паўтарылася – аўтамабіль Мілінкевіча затрымоўвалі двойчы.

У вёсцы Парычы Светлагорскага раёна аўтамабіль, у якім знаходзіўся Аляксандр Мілінкевіч, быў затрыманы на той падставе, што супрацоўнікі ДАІ выказалі здагадку, што намеснік старшыні Партыі БНФ Аляксей Кавалец, які быў за рулём аўтамабіля, знаходзіцца ў стане алкагольнага ап’янення. Палітыкаў даставілі для агляду ў фельчарска-акушэрскі пункт вёскі Парычы, а пасля – у Светлагорскі раённы шпіталь, растлумачыўшы гэта адсутнасцю ў Парычах неабходных рэактываў для правядзення экспертызы. Абследаванне ў шпіталі не пацвердзіла падазронаў працаўнікоў ДАІ. У 12.50 Мілінкевіча і Кавальца вызвалілі.

Пакуль іх правяралі, на сустрэчу з выбаршчыкамі ў Рэчыцы Мілінкевіч спазніўся. Прэс-сакратар Мілінкевіча Павал Мажэйка заявіў БелаПАН, што затрыманне было “спланаванай акцыяй улад, мэта якой – не дапусціць сустрэч лідэра дэмсіл з выбаршчыкамі”.

Прыкладна а 15 гадзіне машыну Мілінкевіча, якая накіроўвалася ў Гомель, паўторна затрымалі супрацоўнікі ДАІ, гэтым разам на трасе “Гомель – Кобрын”. Паводле Паўла Мажэйкі, даішнікі заявілі, што машына падазраецца ва ўдзеле ў дарожна-транспартным здарэнні, якое нібы адбылося ў Рэчыцы. Ад палітыка і яго кіроўцы запатрабавалі праехаць у мясцовы райаддзел міліцыі. Мілінкевіч адмовіўся гэта зрабіць, растлумачыўшы, што ў Рэчыцы ён сёння не быў. Тым не менш, тлумачэнні з ДАІ аднялі ў палітыка каля двух гадзін.

Прыкладна ў 20 кіламетрах ад Гомеля аўтамабіль лідэра дэмсіл зноў быў спынены. Супрацоўнікі ДАІ растлумачылі свае дзеянні інфармацыяй аб тым, што пасажыр не прышпілены рамянём бяспекі. Праз гадзіну А.Мілінкевіч накіраваўся ў Гомель, але сустрэча з выбаршчыкамі там ужо скончылася.

Па дарозе ў Добруш палітык затрыманы не быў. Але, прыбыўшы на запланаваны сход, ён не змог патрапіць у залу. Ля увахода стаялі міліцыянты і прадстаўнікі мясцовай улады. Яны паведамілі, што А.Мілінкевіч прыехаў позна і ў памяшканні праходзяць іншыя мерапрыемствы.

7 студзеня па дарозе з Гомеля ў Калінкавічы супрацоўнікі ДАІ двойчы спынялі аўтамабіль Аляксандра Мілінкевіча. Палітык накіроўваўся ў раённы цэнтр для сустрэчы з выбаршчыкамі як давераная асоба кандыдата ў дэпутаты аблсавета, кіраўніка раённай арганізацыі Аб’яднанай грамадзянскай партыі Аляксея Маневіча.

У першы раз, праверыўшы дакументы, супрацоўнікі ДАІ адпусцілі кіроўцаў даволі хутка. Другую праверку дакументаў дарожныя патрульныя з Рэчыцы зрабілі на трасе Гомель – Калінкавічы на скрыжаванні Рэчыца – Хойнікі.