З-за Пуціна і Лукашэнкі Еўропа засталася без нафты :: Хартыя'97 :: Навiны

Пастаўкі расейскай нафты па нафтаправодзе “Дружба” спыненыя ў шэсць краін Еўропы – Польшчу, Нямеччыну, Вугоршчыну, Славакію, Чэхію і Украіну, паведамляе БелаПАН. У аўторак раніцай у Маскву вылецеў віцэ-прэм’ер Беларусі Андрэй Кабякоў. Як гаворыцца ў паведамленні беларускай амбасады ў Расеі, мэтай візіту Кабякова ў Маскву з’яўляецца “урэгуляванне на аснове перамоваў узаемных прэтэнзій адносна ўвядзення расейскім бокам у аднабаковым парадку і ў парушэнне шэрагу беларуска-расейскіх пагадненняў і дамоў вывазной мытнай пошліны на нафту, якая пастаўляецца ў Беларусь, а таксама беларускай пошліны на нафту”, якая перамяшчаецца праз тэрыторыю Беларусі.

Напярэдадні ўвечар у Маскву таксама прыбыла беларуская дэлегацыя на чале з першым намеснікам міністра эканомікі Уладзімірам Найдунавым.

У сераду ў Крамлю чакаюць прэм’ер-міністра Беларусі Сяргея Сідорскага.

Транзіт нафты па тэрыторыі Беларусі быў спынены ў ноч на панядзелак. “Транснафта” заявіла аб несанкцыянаваным адборы паліва беларускім бокам (79 тыс. тон з запланаванай 91 тыс.) у кошт выплаты пошліны, уведзенай з 1 студзеня. Расейская кампанія лічыць пошліну пазапраўнай і заяўляе, што Беларусь адмаўляецца здзяйсняць транзіт нафты без выплаты гэтай пошліны. Афіцыйны Менск сцвярджае, што “ціск на ўваходзе нафтаправода “Дружба” на тэрыторыі Беларусі быў паніжаны не па віне беларускага боку”.

Польшча паведаміла, што валодае запасамі нафты на 80 дзён, Славакія – на 70, Вугоршчына – на 90, Нямеччына – на 130 дзён.