Кандыдат у дэпутаты арыштаваны на 7 сутак :: Хартыя'97 :: Навiны

Кандыдат у дэпутаты Пінскага гарадзкога савету Аляксандар Васільеў асуджаны на 7 сутак адміністрацыйнага арышту. Яго зьвінавацілі ў дробным хуліганстве падчас нарады мясцовай вэртыкалі з чальцамі выбарчых камісіяў, паведамляе “Радыё Свабода”. Удзельнікі выбараў на Берасьцейшчыне заяўляюць, што гэта не адзінкавы прыклад ціску ўладаў на незалежных кандыдатаў.

Незалежнага кандыдата ў дэпутаты Аляксандра Васільева затрымалі 8 студзеня. Пра прычыну зьняволеньня ягоныя калегі ў выбарчай кампаніі даведаліся толькі на наступны дзень, падчас судовага паседжаньня.

“Яго затрымалі за тое, што ён выпадкова апынуўся на сустрэчы кіраўніцтва райвыканкаму з сакратарамі выбарчых камісій. Праводзіў начальнік юрыдычна-прававога аддзелу Мельнічук. Між іншым, ён сказаў: падайце ў выканкам пустыя блянкі пратаколаў з подпісамі чальцоў выбарчых камісій. Васільеў тое пачуў, падняўся і сказаў, што гэта фальсыфікацыя і крымінал. І тут пачалося: павалілі на падлогу, выклікалі міліцыю і – судзілішча”, -- гаворыць кандыдат у дэпутаты пінскага гарсавету Аляксандар Аўсеенка.

Паводле рашэньня гарадзкога суду Пінску, Аляксандар Васільеў мусіць адбыць сем сутак адміністрацыйнага арышту за, нібыта, нецэнзурную лаянку.

Дэпутат гарсавету ў Белаазёрску Юрась Губарэвіч, які балятуецца таксама на новы тэрмін, кажа, што на Берасьцейшчыне назіраюцца й іншыя прыклады ціску ўладаў на незалежных вылучэнцаў.

“У Бярозаўскім раёне быў праведзены ператрус на кватэры, дзе выдаецца незалежная газэта “Альтанка”. Але яе пяць гадоў выдавалі грамадзкія актывісты, а затым і дэпутаты гарадзкога савету. Усё гэта можна разглядаць як ціск на кандыдатаў, на тых людзей, хто дапамагае кандыдатам. Канечне, чакаць чагосьці ад гэтых выбараў не выпадае”, -- упэўнены Губарэвіч.