Пра што яны дамовіліся? :: Хартыя'97 :: Навiны

Уладзімір Пуцін абмеркаваў з Аляксандрам Лукашэнкам па тэлефоне праблемы транзіту расейскай нафты праз Беларусь, паведамляе прэс-служба Крамля. “Падчас размовы абмяркоўваліся пытанні эканамічнага супрацоўніцтва паміж РФ і Беларуссю, у тым ліку, у сферы энергетыкі, уключаючы праблемы транзіту расейскай нафты праз тэрыторыю Беларусі”, – сказалі ў прэс-службе, адзначыўшы, што гутарка адбылася па ініцыятыве беларускага боку. Тым часам, беларускі бок сцвярджае, што Менск і Масква дасягнулі кампрамісу па пытаннях транзіту расейскай нафты па тэрыторыі Беларусі.

Прэс-служба Лукашэнкі паведамляе, што прэзідэнты Расеі і Беларусі Уладзімір Пуцін і Аляксандр Лукашэнка правялі “працяглую” тэлефонную гутарку на конт узаемаадносінаў двух дзяржаў у гандлёва-эканамічнай сферы. Падчас тэлефонных перамоваў гаворка ішла пра забеспячэнне Беларусі энергарэсурсамі, а таксама пра пастаўкі вуглевадароднай сыравіны ў краіны Еўропы.

“У выніку гутаркі знойдзены кампраміс, які дазволіць разблакаваць гэтую тупіковую сітуацыю, у тым ліку і датычную транзіту расейскай нафты ў краіны Еўропы праз тэрыторыю Рэспублікі Беларусь”, – адзначаецца ў паведамленні прэс-службы беларускага кіраўніка.

Прэм’ер-міністрам Беларусі і Расеі даручана на працягу двух дзён выпрацаваць пэўныя прапановы па развязанні ўсіх праблемных пытанняў і занесці іх на разгляд кіраўнікоў дзяржаў да 12 студзеня 2007 года, адзначае прэс-служба Лукашэнка.

Нагадаем, 3 студзеня 2007 года Беларусь заявіла, што мае намер увесці мытную пошліну на транзіт расейскай нафты ў Еўропу – 45 даляраў за тону нафты. Аляксандр Лукашэнка даручыў ураду, каб у першым квартале Расеі былі накіраваныя прапановы “па аплаце ўсяго таго, што яны атрымоўваюць у Беларусі бясплатна, пачынаючы з вайсковых аб’ектаў і транзіту”.

Паводле яго, Расея “напярэдадні новага года зрабіла ў сферы нашых гандлёва-эканамічных адносінаў вельмі непрыязныя крокі”. Ён растлумачыў, што гаворка ідзе аб падвышэнні цаны на газ амаль у 2,5 разы і цаны на пастаўкі сырой нафты. “Такая цана нас не задавальняе. І такі бізнэс у свеце не існуе”, – сказаў Лукашэнка.

Лукашэнка падкрэсліў, што “калі яны, захлёбваючыся ад нафтадаляраў і іншых паступленняў валюты, збіраюцца на Беларусі адыграцца і паставілі нас ва ўмовы працы нават горшыя за Нямеччыну і іншыя еўрапейскія краіны, так давайце папросім такую багатую Расею заплаціць нам за паслугі, якія ёй прадстаўляюцца”, – абвясціў беларускі кіраўнік.

Акрамя таго, 4 студзеня стала вядома, што расейская нафта, якая праходзіць транзітам па нафтаправодах Беларусі, з 1 студзеня падлягае мытнаму афармленню.

З 8 студзеня пастаўкі расейскай нафты па нафтаправодзе “Дружба” спыненыя ў шэсць краін Еўропы – Польшчу, Нямеччыну, Вугоршчыну, Славакію, Чэхію і Ўкраіну. Расейская “Транснафта” абвінаваціла Беларусь у несанкцыянаваным адборы 79 тысяч тон нафты.

Раніцай 9 студзеня “Транснафта” накіравала судовыя пазовы ў сувязі з дзеяннямі беларускага боку, заявіў кіраўнік Мінпрамэнерга Расеі Віктар Хрысценка.