Кандыдаты ад апазіцыі масава адмаўляюцца ад удзелу ў выбарах :: Хартыя'97 :: Навiны

Шэраг дэмакратычных кандыдатаў мясцовых саветаў у Магілёве, Гомелі і Бабруйску адмовіліся ад удзелу ў выбарах.

Так, кандыдаты ў дэпутаты ад Беларускай сацыял-дэмакратычнай партыі (Грамада) з Бабруйска Таісія Кабанчук і Надзея Грынявіцкая падалі заяўкі ў гарадскія выбарчыя камісіі аб адмове прымаць удзел у выбарах.

“Нашае рашэнне было абумоўленае выказваннем прэзідэнта падчас прэс-канферэнцыі з прадстаўнікамі ўкраінскіх СМІ, калі казалася пра фальсіфікацыю прэзідэнцкіх выбараў, – пракаметавала сваё рашэнне лідэрка бабруйскіх сацыял-дэмакратаў Т.Кабанчук. – Пацвердзіла нашае рашэнне публікацыя ў газеце “Вечерний Бобруйск” за нумарам №95 “Тонкости нашей идеологии”, дзе намеснік старшыні гарвыканкама Міхаіл Кавалевіч выказваўся пра тое, што ў апазіцыі няма шанцаў быць абранымі ў гарвыканкам. Мы не жадаем прымаць удзел у выбарах, калі загадзя вядома, хто будзе дэпутатам, а ўлада на месцы прыналежыць не савету дэпутатаў, а прэзідэнцкай вертыкалі”.

Пра сваё рашэнне Таісія Кабанчук і Надзея Грынявіцкая паінфармавалі выбаршчыкаў.

Адмовіліся ад удзелу ў выбарах таксама і ў Магілёве – сябры незалежнага Беларускага прафсаюза радыёэлектроннай прамысловасці, іншых галін народнай гаспадаркі Аляксандр Каралёў і Уладзімір Тузаў і кандыдат у гарадскі савет дэпутатаў ад Партыі БНФ Зміцер Салаўёў.

Як паведамляе БелаПАН юрыст незалежнага прафсаюза Аляксандр Каралёў, гэтае рашэнне было звязанае з тым, што немагчыма правесці сустрэчы з выбаршчыкамі. Паводле яго, “не існуе празрыстасці выбараў і іх вынікі загадзя вядомыя”.

Як адзначыў прадстаўнік Партыі БНФ Зміцер Салаўёў, “выбары не адпавядаюць прынцыпам дэмакратычнасці, супярэчаць Канстытуцыі Рэспублікі Беларусь і Выбарчаму кодэксу”. “Мне было адмоўлена ў правядзенні сустрэч з выбаршчыкамі, і гэта стала апошняй кропляй, якая падштурхнула мяне да гэтага рашэння”, – сказаў З.Салаўёў.

У Гомельскай вобласці пяць кандыдатаў у дэпутаты мясцовых саветаў ад дэмакратычных сілаў знялі свае кандыдатуры з выбараў. Учора адпаведныя заявы падалі ў акруговыя камісіі сябры Аб’яднанай грамадзянскай партыі Віктар Карніенка(Сонечная выбарчая акруга № 16) і Зінаіда Шуміліна (Любенская выбарчая акруга № 12), якія балатаваліся ў абласны савет дэпутатаў. Аб гэтым БелаПАН паведаміў старшыня Гомельскай абласной арганізацыі АГП Васіль Палякаў.

“Галоўным чынам, гэта пратэст супраць затрымання на Гомельшчыне Аляксандра Мілінкевіча – даверанай асобы кандыдатаў, – паведаміў В.Палякоў. – І тое, што ўлады забаранілі правесці пікеты”. В.Палякоў адзначыў, што іншыя сябры АГП – Леанід Судаленка, Аляксандр Працко, якія балатуюцца ў абоасны савета, і Мікола Калюка, які будзе абірацца ў гарсавет, – не маюць намеру здымаць свае кандыдатуры.

Раней яшчэ тры кандыдаты ў дэпутаты ў Гомельскай вобласці таксама знялі свае кандыдатуры з выбараў у знак пратэсту супраць зрыву сустрэч лідэра дэмакратычных сілаў Аляксандра Мілінкевіча з выбаршчыкамі. Анатоль Паплаўны ў Гомелі, Валерый Пуціцкі ў Рэчыцы і Віктар Раманішка ў Светлагорску падалі адпаведныя заявы ў выбарчыя камісіі. В.Пуціцкі і В.Раманішка былі кандыдатамі ў дэпутаты Гомельскага абласнога савета, А.Паплаўны – Гомельскага гарадскога савета. В.Пуціцкі быў таксама кандыдатам у дэпутаты Рэчыцкага раённага савета.