Канцлер Нямеччыны едзе ў Маскву па нафту :: Хартыя'97 :: Навiны

Федэральная канцлерка ФРГ Ангела Меркель прыбудзе 21 студзеня, у адпаведнасці з дасягнутай дамоўленасцю, з працоўным візітам у Расею. Як паведаміла прэс-служба Крамля, праграмай візіту прадугледжваюцца расейска-нямецкія перамовы на вышэйшым узроўні.

Раней сама Ангела Меркель заявіла, што яе візіт у Маскву звязаны з праблемамі, якія ўзніклі с прычыны адмовы Менска транспартаваць расейскую нафту ў Еўропу. Паводле яе, збоі ў пастаўках нафты падрываюць давер паміж Еўразвязам і Расеяй у цэлым і пагражаюць супрацоўніцтву, якое без даверу неймаверна, паведамляе “Росбалт”.

Адзначым таксама, што з 1 студзеня гэтага года ФРГ старшынствуе ў Радзе Еўразвяза.

Нагадаем, транзіт расейскай нафты праз тэрыторыю Беларусі цалкам спынены. Пра тое, што пастаўкі нафты з РФ спыненыя, паведамілі афіцыйныя прадстаўнікі Нямеччыны, Польшчы і Вугоршчыны, Славакіі і Чэхіі.

Кіраўнік “Транснафты” Сямён Вайншток сцвярджае, што Беларусь з 6 студзеня пазапраўна адабрала з нафтаправода “Дружба” 79 тыс. тон расейскай нафты, прызначанай краінам Еўропы.

Нагадаем, што пастаўкі нафты з Расеі ў Беларусі былі пазбаўленыя экспартных збораў. Масква з 1 студзеня 2007 года ўвяла пошліну ў памеры $180,7 за адну тону нафты. А 3 студзеня стала вядома, што Беларусь таксама з пачатку года ўвяла пошліну ў памеры $45 за тону на транспартоўку расейскай нафты па тэрыторыі рэспублікі.