Урад Беларусі пераглядае рашэнне па ўвядзенні пошліны на транзіт нафты :: Хартыя'97 :: Навiны

Прэзідыўм урада Беларусі разглядае па даручэнні кіраўніка дзяржавы сваю пастанову ад 31 снежня 2006 года, якой была ўведзеная экспартная пошліна на транзіт нафты па тэрыторыі Беларусі. Як перадае карэспандэнт “Інтэрфакса”, пра гэта паведаміў прэ’мер-міністр Беларусі Сяргей Сідорскі, падчас адкрыцця паседжання прэзідыўма Савета міністраў.

С.Сідорскі нагадаў, што 31 снежня 2006 года ўрад Беларусі прыняў рашэнне аб увядзенні пошліны (45 даляраў за 1 тону – ІФ) за расейскую нафту, якая прапампоўваецца праз тэрыторыю Беларусі. Ён удакладніў, што гэтае рашэнне ўносіла міжведамасная камісія, і ўрад яго ўхваліў.

“Сёння адбылася працяглая тэлефонная гутарка паміж прэзідэнтамі Беларусі і Расеі па дадзенай тэме”, – сказаў С.Сідорскі. “Прэзідэнт Беларусі даручыў ураду разгледзець гэтае пытанне”, – сказаў прэм’ер-міністр. Пасля гэтага С.Сідорскі прапанаваў міністру эканомікі Мікалаю Зайчанку зрабіць даклад па гэтай тэме, “каб прыняць узаемнае рашэнне зыходзячы з эканамічных інтарэсаў Беларусі”.

Як перадае карэспандэнт “Інтэрфакса”, пасля гэтага паведамлення прэм’ер-міністра прадстаўнікоў СМІ папрасілі пакінуць залу паседжанняў прэзідыўма. Тым часам, па выніках паседжання чакаецца заява С.Сідорскага для прэсы.