Лукашэнку давялося скасаваць пошліну на транзіт нафты :: Хартыя'97 :: Навiны

Урад Беларусі адмяніў сваю пастанову аб увядзенні збору за транзіт нафты па тэрыторыі Беларусі, заявіў журналістам пасля паседжання прэзідыума Савета міністраў у сераду прэм’ер-міністр Беларусі Сяргей Сідорскі. “Урад, улічваючы двухбаковыя дамоўленасці з Расейскай Федэрацыяй, сёння прыняў рашэнне аб прызнанні страціўшым сілу свайго рашэння аб увядзенні дзяржаўнага збору за транзіт нафты па магістральных нафтаправодах”, – заявіў С.Сідорскі.

С.Сідорскі нагадаў, што 31 снежня 2006 года ўрад Беларусі прыняў рашэнне аб увядзенні пошліны (45 даляраў за 1 тону) за расейскую нафту, якая перамяшчаецца па тэрыторыі рэспублікі Ён удакладніў, што гэтае рашэнне ўнесла міжведамасная камісія, і ўрад яго ўхваліў.

Па словах С.Сідорскага, ён заўтра вылятае ў Маскву, каб сустрэцца з прэм’ер-міністрам Расеі Міхаілам Фрадковым.

“Заўтра я вылятаю ў Маскву, каб сустрэцца з прэм’ер-міністрам Расеі. Спадзяюся, што цягам 2-х дзён мы здымем усе ўзаемныя рознагалоссе і прэтэнзіі па пастаўках расейскай нафты”, – сказаў С.Сідорскі.

Ён таксама паведаміў, што беларускай дэлегацыі на чале з віцэ-прэм’ерам Беларусі Андрэем Кабяковым даручана праводзіць перамовы па зняцці абмежаванняў ва ўзаемным гандлі. “Зараз я ўвайду ў кантакт з Міхаілам Фрадковым, і мы пачнем працаваць”, – паведаміў С.Сідорскі.

“Мы спадзяемся, што Транснафце будуць дадзеныя адпаведныя даручэнні”, – сказаў прэм’ер-міністр.

С.Сідорскі растлумачыў, што Лукашэнка даручыў яму выехаць заўтра ў Маскву на перамовы з кіраўніком урада РФ пасля працяглай гутаркі кіраўнікоў дзвюх дзяржаў, якая адбылася сёння.

Нагадаем, што Уладзімір Пуцін абмеркаваў сёння з Аляксандрам Лукашэнкам па тэлефоне праблемы транзіту расейскай нафты праз Беларусь, паведамляе прэс-служба Крамля. “Падчас гутарак абмяркоўваліся пытанні эканамічнага супрацоўніцтва паміж РФ і Беларуссю, у тым ліку ў сферы энергетыкі, уключна праблемы транзіту расейскай нафты цераз тэрыторыю Беларусі”, – сказалі ў прэс-службе, адзначыўшы, што гутарка адбылася з ініцыятывы беларускага боку.

Тым часам беларускі бок сцвярджае, што Менск і Масква дасягнулі кампрамісу па пытаннях транзіту расейскай нафты па тэрыторыі Беларусі.

Прэс-служба Алаксандра Лукашэнкі паведамляе, што прэзідэнты Расеі і Беларусі Уладзімір Пуцін і Аляксандр Лукашэнка мелі “працяглую” тэлефонную гутарку наконт узаемаадносінаў дзвюх дзяржаў у гандлёва-эканамічнай сферы. Падчас тэлефонных перамоваў гаворка ішла пра забеспячэнне Беларусі энергарэсурсамі, а таксама пра пастаўкі вуглевадароднай сыравіны ў краіны Еўропы.

“У выніку гутаркі знойдзены кампраміс, што дазволіць разблакаваць тупіковую сітуацыю, у тым ліку і ў дачыненні да транзіту расейскай нафты ў краіны Еўропы цераз тэрыторыю Рэспублікі Беларусь”, – адзначаецца ў паведамленні прэс-службы беларускага кіраўніка.

Прэм’ер-міністрам Беларусі і Расеі даручана цягам двух дзён выпрацаваць пэўныя прапановы па развязанні ўсіх пытанняў і ўнесці іх на разгляд кіраўнікоў да 12 студзеня 2007 года, адзначае прэс-служба Лукашэнкі.

Нагадаем, што з 1 студзеня 2007 года дзейнічае рашэнне расейскага ўрада па ўвядзенні пошліны ў памеры 181 даляр ЗША за тону нафты, якая пастаўляецца ў Беларусь, што можа вельмі дрэнна паўплываць на эканоміку Беларусі. 3 студзеня беларускі ўрад адказаў увядзеннем з 1 студзеня 2007 года мытнай пошліны ў памеры 45 даляраў ЗША на транзіт тоны расейскай нафты па беларускім нафтаправодзе на Захад. Аляксандр Лукашэнка санкцыянаваў увядзенне пошліны ў той самы дзень падчас паседжання кабінета міністраў пад яго старшынствам. Паседжанне транслявалася па беларускім тэлебачанні. “Яны захлёбваюцца нафтадалярамі, але вырашылі нанесці ўдар па Беларусі”, – дакараў Аляксандр Лукашэнка Расейскую Федэрацыю за “вельмі непрыязныя крокі”.