Віктар Лукашэнка ўведзены ў склад Савета бяспекі :: Хартыя'97 :: Навiны

Віктар Лукашэнка, які знаходзіцца на пасадзе памагатага прэзідэнта па нацыянальнай бяспецы, афіцыйна ўведзены ў склад савета бяспекі Рэспублікі Беларусь. Адпаведнае рашэнне прэзідэнта знаходзіцца ва ўказе № 3 ад 5 студзеня 2007 года, паведамляе “Ежедневник”. Cтатус старэйшага сына Аляксандра Лукашэнкі фактычна прыраўнаны да статусу старшыні КДБ альбо кіраўніка МУС.

Персанальны склад Савета бяспекі зацверджаны ўказам прэзідэнта № 41 ад 23 студзеня 2005 года. Службовыя складнікі Савета бяспекі даволі простыя. Акрамя дзяржаўнага сакратара Савета бяспекі ў яго ўваходзяць прэзідэнт, прэм’ер-міністр, кіраўнік Адміністрацыі прэзідэнта, старшыні абедзвюх палат “нацыянальнага сходу”, старшыня Нацыянальнага банка, міністр фінансаў, а таксама кіраўнікі выключна сілавых ведамстваў Беларусі.

Такога сябра Савета бяспекі, як памагаты прэзідэнта, якіх, як вядома, у Аляксандра Лукашэнка досыць, да апошняга моманту не мелася. Такім чынам, адзначае “Ежедневник”, статус старэйшага сына Аляксандра Лукашэнкі фактычна прыраўнаваны да статусу старшыні КДБ альбо кіраўніка МУС.

Акрамя таго, ва ўказе адлюстраваная змена ў кіраўніцтве Камітэта дзяржаўнага кантролю, які, як вядома, у кастрычніку 2006 года ўзначаліў Зянон Ломаць.