Сенатар Лугар абвінаваціў Расею ў «энергетычным шантажы» :: Хартыя'97 :: Навiны

Сенатар-рэспубліканец Рычард Лугар абвінаваціў Расею ў выкарыстанні “энергетычнага шантажу” у стасунках з Беларуссю і іншымі суседнімі дзяржавамі. “Расея не ўпершыню выкарыстоўвае свой кантроль над пастаўкамі энергіі для прымусу іншых краін”, – сцвярджае Лугар і заяўляе, што спыненне паставак нафты ў Беларусь, якое Расея здзейсніла ў панядзелак, “пагражае не толькі Беларусі, але таксама Польшчы, Нямеччыне, Вугоршчыне, Славакіі і Чэхіі, якія атрымоўваюць нафту з гэтай жа трубы”.

“Калі цяпер не будуць распачатыя неабходныя крокі, падобны энергетычны шантаж можа стаць у будучыні рэгулярным”, – сцвярджае сенатар і нагадвае, што значная частка дзяржаў Цэнтральнай і Усходняй Еўропы, а таксама СНД “на 100% залежыць ад паставак прыроднага газу з Расеі”.

“Хоць Расея і з’яўляецца сёння самым прыкметным парушальнікам, яна не адзіная дзяржава ў свеце, якая можа выкарыстоўваць энергію ў якасці зброі супраць сваіх суседзяў і спажыўцоў. Іран і Венесуэла таксама пагражалі выкарыстаць кантроль над пастаўкамі нафты для запалохвання міжнародных апанентаў”, – гаворыцца ў распаўсюджанай у Вашынгтоне заяве Лугара.

“Гэта не пустыя пагрозы, і энергія з’яўляецца магутнай зброяй”, – заявіў сенатар. Ён нагадаў таксама пра пагрозу ўзброенага канфлікту з прычыны недахопу энергіі ў Еўропе ў самыя блізкія дзесяцігоддзі і заклікаў улічваць гэтую энергетычную пагрозу ў дзейнасці НАТО.

“Я рашуча прапаноўваю тэрмінова пачаць планаванне ў сферы бяспекі для НАТО”, – заявіў Лугар.