Лукашэнка едзе ў Маскву? :: Хартыя'97 :: Навiны

Аляксандр Лукашэнка, магчыма, заўтра паляціць у Маскву для сустрэчы з прэзідэнтам Расеі Уладзімірам Пуціным. Пра гэта паведаміў тэлеканал НТВ. Аднак, як падкрэслівае НТВ, гэта адбудзецца ў выпадку, калі на перамовах прэм’ер-міністраў дзвюх краін будуць дасягнутыя пэўныя дамоўленнасці па нафтагазавым расейска-беларускім крызісе.

У Маскве зноў пачаліся расейска-беларускія перамовы па пытаннях гандлю, у тым ліку па пастаўках і транзіце нафты. Нагадаем, што для развязання гэтых пытанняў беларуская дэлегацыя прыехала ў Маскву яшчэ 9 студзеня, але перамовы пачаліся толькі пасля таго, як беларускі ўрад адмяніў транзітную пошліну на нафту.

У перамовах у чацвер удзельнічаюць прэм’ер-міністр Беларусі Сяргей Сідорскі і міністр эканамічнага развіцця і гандлю Расеі Герман Грэф, намеснік кіраўніка Мінэканамразвіцця РФ Віталь Савельеў і віцэ-прэм’ер Беларусі Андрэй Кабякоў. Паведамлялася, што Сідорскі плануе сустрэцца з кіраўніком урада РФ Міхаілам Фрадковым.

Чакаюць, што на перамовах будуць выпрацаваныя пэўныя прапановы па развязанні супярэчнасцяў між дзвюма краінамі ў рамках адзінага Мытнага саюза, у тым ліку і па пастаўках і транзіце расейскай нафты. Як распавёў намеснік міністра эканамічнага развіцця і гандлю РФ Андрэй Шаронаў, беларускі бок планаваў узняць пытанне аб адмене Расеяй экспартнай пошліны на пастаўляную ў Беларусь нафту.

Напярэдадні беларускі ўрад правёў пазачарговае паседжанне, і па ягоных выніках прэм’ер-міністр абвясціў пра адмену рашэння аб увядзенні мытнай пошліны на транзіт расейскай нафты.