Незалежную газету пазбаўляюць памяшкання :: Хартыя'97 :: Навiны

Гаспадарчы суд Віцебскай вобласці 10 студзеня задаволіў пазоў ААТ “Элсан” да ЗАТ “Выдавецкі дом “Витебский курьер” аб скасаванні дамовы арэнды памяшкання, дзе ў цяперашні час знаходзіцца офіс рэдакцыі. Паводле рашэння, якое вынесла суддзя Вольга Гаціла, газета абавязаная вызваліць памяшканне ў 10-дзённы тэрмін са дня ўступлення судовага рашэння ў сілу.

У памяшканне, якое стала прадметам цяжбы, рэдакцыя “Витебского курьера” пераехала 20 кастрычніка 2006 года. Дамова з арэндадаўцам – прадпрыемствам “Элсан” была складзеная 27 верасня 2006 года да 31 жніўня 2007 года. Аднак 6 снежня “Витебский курьер” атрымаў ад арэндадаўца пісьмовае патрабаванне на працягу двух сутак вызваліць памяшканне. Рэдакцыя адмовілася выканаць гэты загад, пасля чаго прадпрыемства “Элсан” звярнулася ў суд, паведамляе БелаПАН.

“Дамова арэнды была складзенная з парушэннямі заканадаўства, бо ЗАТ “Выдавецкі дом “Витебский курьер” не атрымала згоды на размяшчэнне свайго офіса ад адміністрацыі Першамайскага раёна Віцебска”, – такі аргумент неаднаразова прыводзіў на судзе прадстаўнік ісца Аляксандр Сямёнаў. Паводле яго слоў, прадпрыемства “Элсан” павінна было б вярнуць рэдакцыі выплачаную арэндную плату, але з той прычыны, што адказчык і далей карыстаецца памяшканнем, то гэтыя грошы вернутыя не будуць.

Як паведамляе БелаПАН сябра Віцебскага аддзялення РГА “Беларускі Хельсінкскі камітэт” Павал Левінаў, які прадстаўляў у судзе інтарэсы газеты, рэдакцыя мае намер абскардзіць судовае рашэнне. “Витебский курьер” не будзе нікуды пераязджаць са свайго офіса: пакуль будзе працягвацца абскарджанне, знаходжанне рэдакцыі ў гэтым памяшканні будзе цалкам законным”, – лічыць праваабаронца.

На меркаванне выканаўчага дырэктара ЗАТ “Выдавецкі дом “Витебский курьер” Жаны Паповай, рашэнне аб высяленні газеты “неправамернае і было прадказальнае”.

З красавіка 2006 года “Витебский курьер” з’яўляўся адказчыкам на трох судовых працэсах, пры гэтым у рэдакцыі атрымалася выйграць толькі адну справу.