Перамовы ў Маскве цягнуцца ўжо больш за сем гадзін :: Хартыя'97 :: Навiны

Перамовы беларускай і расейскай урадавых дэлегацый на чале з прэм’ер-міністрамі Сяргеем Сідорскім і Міхаілам Фрадковым працягваюцца ў Белым доме ў абмежаваным складзе. Як перадае карэспандэнт “Інтэрфакса”, сёння перамовы ў агульнай складанасці доўжацца ўжо больш за сем гадзін.

Нагадаем, у чацвер адбыліся перамовы беларускай дэлегацыі на чале з прэм’ер-міністрам у Мінэканамразвіцця Расеі. Гэтыя перамовы цягнуліся 6 гадзін.

Раней прэзідэнты Беларусі і Расеі паводле вынікаў тэлефоннай гутаркі даручылі да 12 студзеня кіраўнікам урадаў вырашыць увесь комплекс праблем у двухбаковым гандлі. У першую чаргу гэта тычыцца праблем паставак нафты і цукру.

Прэм’ер-міністр Беларусі С.Сідорскі прыбыў у Маскву раніцай 11 студзеня. Беларуская дэлегацыя на чале з віцэ-прэм’ерам Андрэем Кабяковым знаходзіцца ў Маскве з 9 студзеня.

Раней прэм’ер-міністр Расеі М.Фрадкоў сказаў, што Расея можа прапанаваць Беларусі збалансаванае і зразумелае рашэнне нафтавай праблемы.

“Вельмі хацелася б, каб гэтае рашэнне было празрыстым, сапраўды зразумелым і вынікала з неабходнасці працягваць супрацоўніцтва з улікам інтарэсаў развіцця эканомік нашых краін”, – сказаў М.Фрадкоў.

Прэм’ер заклікаў “знайсці збалансаванае рашэнне, зразумелае для ўсіх”.

“Тэма нафты вельмі важная, я ведаю, што ў вас з калегамі былі інтэнсіўныя перамовы, я гатовы іх працягнуць і гатовы прапанаваць варыянты, якія будуць зразумелыя і для дзяржавы, і для бізнэсу, які вельмі ўважліва сочыць за развіццём гэтай сітуацыі”, – падкрэсліў М.Фрадкоў.

У сваю чаргу С.Сідорскі выказаў надзею на магчымасць аператыўнага развязання наяўных праблем.