У Маскве Сідорскага пазбавілі слова :: Хартыя'97 :: Навiны

Журналістаў пазбавілі магчымасці пачуць уступнае слова прэм’ер-міністра Беларусі на перамовах у Маскве – Сяргей Сідорскі выступаў без прадстаўнікоў СМІ.

Такім чынам, прамова беларускага прэм’ера не была пачутая, што выклікала незадавальненне журналістаў. Усіх журналістаў папрасілі пакінуць залу пасля выступу Міхаіла Фрадкова.

Нагадаем, што падчас адкрыцця вячэрняга раунда перамоваў, расейскі прэм’ер Міхаіл Фрадкоў прызнаў, што ад спынення транзіту расейскага газу цераз Беларусь пацярпеў імідж Расеі як надзейнага пастаўшчыка энергарэсурсаў. “Нашы перамовы заўсёды адрозніваліся прагматычным падыходам з улікам інтарэсаў нашых краін. Нажаль, у апошні час нешта не спрацавала, і я вам адкрыта скажу, у выніку пацярпеў імідж Расеі як надзейнага пастаўшчыка энергарэсурсаў”, – сказаў Фрадкоў. Ён таксама адзначыў, што гэта суправаджалася выдаткамі, якія расейскі бюджэт нясе ў рамках “саюзнай дзяржавы” і ЕўрАзЭС.

Прэм’ер-міністр Расеі заявіў, што “гатовы прапанаваць рашэнні, якія задаволяць і нашыя дзяржавы, і бізнэс”. “Вельмі хацелася б адшукаць збалансаванае, зразумелае ўсім рашэнне, каб інтарэсы нашых краін былі выкананыя, каб гэтае рашэнне было празрыстым, сапраўды зразумелым і выцякала з неабходнасці працягваць супрацоўніцтва з улікам інтарэсаў развіцця эканомік нашых краін”, – сказаў Фрадкоў.