«Gazeta Wyborcza»: На гэтых выбарах вырашалі КГБ і міліцыя :: Хартыя'97 :: Навiны

Польская “Gazeta Wyborcza” на першай старонцы падала артыкул Андрэя Пачобута й Вацлава Радзівіновіча пра мясцовыя выбары ў Беларусі - пад назваю “Саветы Лукашэнкі. На гэтых выбарах вырашалі КГБ і міліцыя”.

“Сытуацыя была абсалютна ясная ў малых правінцыйных мястэчках, дзе ў выбарчых сьпісах значылася па адной асобе, вызначанай КГБ і ідэалягічнымі аддзеламі выканкамаў. Гэтага фокусу не ўдалося паўтарыць у Менску і некалькіх большых гарадох. Але калі хоць адзін апазыцыйны кандыдат пройдзе ў саветы – можна казаць пра сэнсацыю”, -- цытуе артыкул “Еўрапейскае радыё”.

“Перад выбарамі былі рэпрэсіі, аблавы і арышты апазыцыі”, -- адзначае выданьне. “Спэцслужбы і міліцыя старанна падрыхтаваліся. За некалькі тыдняў шэф КГБ Сьцяпан Сухарэнка заявіў, што апазыцыя хоча выкарыстаць выбары для арганізацыі закалотаў і замахаў на дзяржаўны лад. Каб засьцерагчыся, міліцыя напярэдадні выбараў арыштавала прынамсі 40 апазыцыянэраў”.

“Іх усіх зьвінавацілі ў дробным хуліганстве, а сьведкамі былі выключна міліцыянты. Дастаткова, каб у дзень выбараў трымаць чалавека за кратамі” – сказаў Віктар Сазонаў з праваабарончага Цэнтру “Вясна”.

“Улады вабілі народ да выбарчых участкаў аркестрамі й буфэтамі з таннымі гарэлкай і закусьсю. У Беларусі ня страціў актуальнасьці абавязковы ў СССР лёзунг “Выбары – гэта сьвята”. Яўка, асабліва ў правінцыі, была высокая – на 18-ю гадзіну нядзелі склала 77%. У выніку гэтай пародыі былі занятыя 22 658 месцаў у раённых, абласных, гарадзкіх і сельскіх саветах. У сярэднім на месца прэтэндавала па 1,04 кандыдаты”, -- піша выданьне.