Падчас затрымання амапаўцы збілі Каліту да страты прытомнасці :: Хартыя'97 :: Навiны

Прэс-цэнтру Хартыі’97 сталі вядомыя падрабязнасці затрымання лідэра “Моладзі БНФ” Алеся Каліты. Раней паведамлялася, што актывіста апазіцыі затрымалі 12 студзеня ў будынку Фрунзенскага РУУС Менска. Куды ён прыехаў, каб высвятліць лёс затрыманай раней актывісткі Анастасіі Александровіч. Як высветлілі сёння на судзе праваабаронцы, Каліту схапілі ля калегіі адвакатаў Савецкага раёна Менска супрацоўнікі АМАПа. Праваабаронца збіраўся заключыць дамову аб юрыдычнай абароне Анастасіі Александровіч.

Затрымоўвалі моладзевага лідэра супрацоўнікі менскага АМАПа Шапарэнка і Лабкоўскі. Актывіста груба схапілі і запхнулі ў міліцэйскі “УАЗ”. У машыне знаходзіліся яшчэ два амапаўцы, іх прозвішчы пакуль не вядомыя. Моладзевага лідэра люта збілі непасрэдна ў машыне да страты прытомнасці.

У пачуццё яго прывялі з дапамогай нашатыру ўжо ў РУУС Савецкага раёна Менска. У кабінеце следчага А. Каліту прыкавалі кайданкамі да крэсла.

Калі актывісту стала зусім дрэнна, міліцыянты былі змушаныя выклікаць “хуткую дапамогу”. У 9-ым клінічным шпіталі Менска Каліце паставілі дыягназ – “садно мяккай тканіны галавы, грудной клеткі і галёнкі” і параілі звярнуцца да хірурга. Тым не менш, з шпіталя Алеся Каліту вярнулі ў РУУС Савецкага раёна, а пасля адправілі ў спецпрыёмнік-размеркавальнік на Акрэсціна.

Сёння на судзе моладзевага лідэра абвінавацілі ў парушэнні арт. 156 Кодэкса аб адміністрацыйных правапарушэннях – “дробнае хуліганства”. Сведкі абвінавачвання – тыя самыя супрацоўнікі АМАПа Шапарэнка і Лабкоўскі – сцвярджалі, што Каліта нібыта нецэнзурна выказваўся. Суддзя Савецкага суду Севасцьян не прыняла да ўвагі на судзе на судзе тое, што актывіста збілі амапаўцы, і праігнаравала наяўнасць заключэння медыкаў.