Беларусь зноў у канцы спіса :: Хартыя'97 :: Навiны

Беларусь заняла 145-е месца – адно з самых апошніх – у рэйтынгу эканамічных свабодаў, апублікаваным амерыканскай даследчым фондам Heritage Foundation сумесна з The Wall Street Journal.

Аналітыкі фонду ацэньваюць краіны па 10 катэгорыях – ад карупцыі і фінансавых свабодаў да незалежнасці бізнэсу ад урада. У нататках да свайго даследавання спецыялісты Heritage Foundation пішуць, што пасля 13 гадоў складання падобных рэйтынгаў добра відаць, што ў жыхароў тых краін, якія падвышаюць узровень эканамічных свабодаў, хутчэй расце дабрабыт.

Heritage Foundation размясціла краіны па пяці катэгорыях: “эканамічна свабодныя”, “у асноўным свабодныя”, “сярэднесвабодныя”, “у асноўным несвабодныя” і краіны “з прыгнечанай эканомікай”.

Рэйтынг былых савецкіх рэспубалік выглядае наступным чынам:

Эстонія – 12 месца,

Літва – 22 месца,

Арменія – 32 месца,

Грузія – 35 месца,

Латвія – 41 месца,

Казахстан – 75 месца,

Кыргызстан – 79 месца,

Малдова – 81 месца,

Таджыкістан – 98 месца,

Азербайджан – 107 месца,

Расея – 120 месца,

Украіна – 125 месца,

Узбекістан - 132 месца,

Беларусь – 145 месца,

Туркменістан – 152 месца

Дарэчы, Эстонія перагнала не толькі Расею, але і такія краіны як Нямеччына (19 месца), Японя (18 месца) і Гішпанія (27 месца).

Справы з эканамічнымі свабодамі ў самым горшым стане ў Беларусі (сярод краін СНД). Для таго, каб адкрыць уласны бізнэс тут спатрэбіцца 68 дзён. Зрэшты, Беларусь наўрад ці здолее прыцягнуць вялікую колькасць замежнікаў – тут амаль няма ніякіх фінансавых і інвестыцыйных свабодаў, нізкі ўзровень правоў на ўласнасць і высокая ступень карумпаванасці службоўцаў, – адзначае Lenta.ru.

У прэс-рэлізе Heritage Foundation адзначаецца, што свету па-ранейшаму ёсць куды імкнуцца – сярэдні паказчык эканамічных свабодаў складае не на шмат больш за 60,5 балаў. У дваццатку лепшых увайшлі дванаццаць краін з Еўропы, тры – з Паўднёвай і Паўночнай Амерыкі, а яшчэ пяць – з ціхаакіянскага рэгіёну.

Паводле дадзеных па Top-20, нескладана вылічыць, які з кантынентаў самы спрыяльны для бізнэсу. Гэта Еўропа (67,5 бала). На другім месцы Паўднёвая і Паўночная Амерыка (62,3 адсотка). Ніжэй сярэднесусветнага паказчыка справы ідуць у ціхаакіянскім рэгіёне, на Блізкім Усходзе і ў Афрыцы.